Изминативе неколку години тренд во светската маркетинг индустрија е појавата на специјализирани дигитални агенции кои на клиентите им помагаат поуспешно да работат и да се развиваат во видно-изменетото опкружување каде вообичаената “бизнис средина“ доби придавка на “дигитална“, а дигиталните комуникации и канали станаа примарен начин на кој брендовите и потрошувачите се поврзуваат меѓу себе.
Една од предводниците на “дигиталната револуцијата“ на маркетинг пазарот во Македонија е и агенцијата Brand Union од Скопје, која се појави меѓу првите во индустријата и за кратко време успеа да направи завидно портфолио на клиенти за чии дигитални стратегии води грижа. Наш денешен гостин е г-ѓа Ира Стефанов Бабиќ, ко-сопственик и директор на агенцијата.
М365: Brand Union за кратко време успеа да се позиционира како една од водечките дигитални агенции на домашниот пазар. Кои услуги доминираат во Вашето портофолио?
Ира: Brand Union е основана во 2012 како маркетинг агенција специјализирана за интернет маркетинг. Годинава славиме 5 години и горди сме што за овој период успеавме да пораснеме и да се изградиме како водечка интернет маркетинг агенција. Услуги кои клиентите најчесто ги бараат се менаџирање на профили на социјални медиуми, креирање на содржина за истите, поставување и оптимизирање на реклами на социјалните мрежи и интернет каналите, изработка на веб банери, изработка на веб страни и SEO оптимизација, креирање на содржина за блог… Сепак, најдоминантни услуги се менаџирањето на профилите на социјалните медиуми, како и онлајн рекламирањето.
М365: Како ја оценувате претходната 2016-та година во индустријата на дигиталниот маркетинг во нашата држава и кои се најважните проекти на кои работеше тимот на BrandUnion?
Ира: Секоја следна година ни е подобра од претходната и тоа се должи пред сѐ на нашата посветеност да ги усовршуваме услугите кои им ги нудиме на нашите клиенти. Самата индустрија е премногу динамична и побарува од нас постојано да ги следиме светските трендови и новости, и истите соодветно да ги адаптираме и предлагаме на нашите клиенти како нови можности и начини за комуникација со публиката.
Претходната година, а тоа го предвидувам и како тренд за оваа 2017 година, ја одбележа поголема свесност кај клиентите за потребата на користење на интернет медиумите за маркетинг комуникација, но истовремено и свесност за квалитетот на содржината која се објавува на онлајн каналите. Уште еден тренд кој верувам дека во следниве години само ќе се зголемува е повисоката свест кај компаниите дека е потребно да одвојуваат буџет наменет за онлајн рекламирање.
Во 2016 работевме на голем број кампањи и проекти, а неколку кои би ги издвоила како поголеми и позначајни се големата наградна игра на Стоби Флипс „Стобиранка“, интегрираните кампањи за кафе Браво Премиум „Тоа е тоа“ каде носечки лик беше Влатко Стефановски, кампањата за бисквитите на Жито Лукс „Кога ќе ти се погодат бисквитите“, launch кампања на Неотел интерактивната телевизија НеоТВ, целосната онлајн комуникација за ТВ серијата „Преспав“, го продолживме видео серијалот со рецепти за Промес сега со нови протаганости, и уште многу други континиурани проекти и кампањи кои ги работиме со Краш, Гранап, B-Watch, Пакомак, Biana Shoes, Алкалоид, Програмата за зачувување на природата и локалниот развој на Брегалничкиот регион…
М365: Колку присуството на социјалните медиуми влијае за зголемување на продажбата на одреден производ или услуга и што е потребно за да се анимира публикатаво новото време кога се чини дека сме пренатрупани со промоции од сите страни?
Ира: Во денешно време излишна е дискусијата дали компаниите треба да користат социјални медиуми за маркетинг цели, правилното прашање е „Кој пристап/стратегија/содржина да се употреби со цел да се разликуваме од конкуренцијата и да го привлечеме вниманието на потрошувачите, а со тоа да се зголеми и продажбата“. Во следниот период предизвикот за компаниите, а и за нас како агенција која се грижи за онлајн позиционирањето на брендовите, е да разбереме дека социјалните медиуми не се единствената алатка, баш спротивно, тие треба да бидат само дел од целосниот маркетинг микс. Потребно е компаниите да навлезат подетално во разбирање на своите потрошувачи од аспект на потреби, мотиви, активности и интереси, да го разберат нивниот процес на избирање и одлучување за конкретен производ т.н. customer journey и согласно овие информации и податоци да ја приспособат својата маркетинг комуникација на реалните потреби и навики на потрошувачите. Многу малку компании користат бази на податоци на своите потрошувачи (CRM) како и поврзување на овие податоци со информациите кои можеме да ги добиеме за секој потрошувач од неговото онлајн однесување (social CRM), детално разбирање на нивните поединечни потреби и навики, а сѐ со цел да ја прилагодиме комуникацијата да биде релевантна за нив. Пример, со ваков пристап банката би можела да препознае потенцијален клиент кој почнал да пребарува и да се интересира за автомобили, па банката може да му испрати прилагодена порака во која му нуди автомобилски кредит по поволна каматна стапка.
Со правилно дефинирање на customer journey имаме можност точно да ги одредиме важните моменти во процесот на одлучување, и токму во тие моменти да пласираме маркетиншка порака која на релевантен начин ќе допре до потрошувачот.
Кога станува збор за анимирање на публиката и издвојување од бројните промотивни пораки, во последно време многу се зборува и за content marketing, што претставува маркетинг и приближување кон потрошувачите преку креирање на интересна и релевантна содржина. Овој пристап во маркетингот не е ништо ново, бидејќи борбата од секогаш била кој ќе продуцира поинтересен и позабележителен ТВ спот, билборд или радио реклама, што не е ништо друго освен креирање на содржина, во минатото наменета за традиционалните медиуми. Разликата од минатото и денес е тоа што денес како потрошувачи користиме многу различни медиуми од каде се информираме и комуницираме, па така и компаниите мора се повеќе да се фокусираат кон стратешки пристап за креирање на содржина за интернет медиумите, кои во суштина се многу побрзи и подинамични, па и со самото тоа и содржината мора да биде соодветна – брза, флексибилна, диманична, релеванта, забавна, да креира емоција кај потрошувачот, а со тоа компанијата да биде препознаена и поразлична од конкуренцијата.
М365: Вашата агенција стана Google партнер во ноември 2016 година. Што е потребно за да се биде дел од листата на Google партнери и кои се придобивките од тоа?
Ира: За една агенција да стане носител на Google Partners беџот потребно е да има онлајн професионалци сертифицирани од Google, како и да ги исполнува условите кои ги налага Google вклучително и постигнување добри резултати при управување со кампањите на постоечките клиенти на подолг период, континуирано одржување и зголемување на базата со клиенти и буџет од минимум 10.000 долари кој што е потрошен на онлајн реклами во последните 3 месеци. Со тоа ги исполнивме условите да се појавуваме во базата на Google Partners во Македонија и Србија што претставува верификација и за нас и за нашите клиенти за добрите резултати што ги постигнувавме, но и дека во иднина ќе продолжиме со испорачување на квалитетни рекламни решенија кои што носат видливи резултати. Голема предност е што секогаш ќе ги имаме први најновите можности што ги нуди огласувачката платформа, како и можност за дополнителна поддршка при реализација на кампањи од страна на Google.
М365: Како го гледате развојот на дигиталниот пазар во Македонија и колку нашите компании се спремни да ги интегрираат дигиталните комуникации во своите бизнис стратегии?
Ира: Секоја година буџетите кои компаниите ги одвојуваат за дигитален маркетинг се поголеми, а со тоа е јасно дека генерално дигиталниот пазар во Македонија е во подем, но сепак сме далеку до некои земји каде дигитал буџетите се поголеми од телевизиските буџети. Во изминатава година спроведовме кампањи кои имаа интегриран пристап и носечката порака се пренесуваше по сите канали подеднакво. Има компании на кои им е сосема јасно дека повеќе не треба да се разговара за традиционален или интернет маркетинг, туку дека интернет комуникацијата е неиозставен дел од целосната маркетинг кампања и стратегија.
Кога зборуваме за бизнис стратегија на една компанија, за некоја дистанца од 5 години за компаниите ќе биде неопходно да се адаптираат на новите технолошки достигнувања и да направат редефиниција на својот бизнис модел согласно бизнис целите, процесите и потребите на нивните потрошувачи. Во се поголемата „војна“ меѓу компаниите за привлекување на вниманието на потрошувачите, нема да победи оној кој е најголем или најсилен, туку оние кои најсоодветно ќе ја искористат технологијата, поточно ќе направат дигитална трансформација на својот бизнис модел. Дигиталната трансформација подразбира целосно прилагодување на работењето на една компанија и остварување на бизнис целите, преку користење на дигитални, иновативни, cloud решенија кои треба да бидат интегрирани во процесите, а со крајна цел да го подобрат искуството на потрошувачот со брендот и производот/услугата. Примери на успешни дигитални трансформации постојат, било да е тоа нова компанија која постоечки бизнис модел го редефинирала (booking, Airbnb, Uber…) или пак компании кои изнаоѓаат начини како да се дигитализираат, модернизираат, а се со цел да ја подобрат својата услуга/производ и да го направат целото искуство на потрошувачот по незаменливои уникатно.
М365: Какви се Вашите очекувања за 2017 година во однос на иднината на медиумската индустрија и дигиталните комуникации воошто?
Ира: Оваа година очекувам позитивниот тренд да продолжи да расте и се повеќе да гледаме маркетинг кампањи во кои интернет комуникацијата зазема доминантно место, а пред сѐ да работиме на интегрирани кампањи. Се надевам дека во иднина се почесто ќе имаме прилика да користиме правилен маркетиншки пристап, имено да ги користиме големите потенцијали на интернет комуникацијата како што се датабазите, анализа на кориснички навики, креирање на маркетинг стратегии кои се прилагодени на потребите на потрошувачите, користење на платформи за маркетинг автоматизација и генерирање/следење на лидови (потенцијални потрошувачи), сѐ со цел да се избегне класичното масовно таргетирање и оптимизирање на маркетинг буџетите, поточно алоцирање на маркетинг буџетите со прецизно таргетирање.