Најпрестижниот светски фестивал за креативност во маркетингот, комуникациите и огласувањето, Cannes Lions, покрај наградите за поединечни проекти, традиционално ги доделува и специјалните признанија за најуспешните агенции, агенциски мрежи, брендови и продукциски компании. Овие признанија се сметаат за едни од највредните во индустријата, бидејќи го одразуваат вкупниот успех и креативната извонредност остварени во текот на целата фестивалска година.
Титулата „Network of the Year“ годинава ја освои Ogilvy, пред VML и TBWA Worldwide. Во регионалните категории, Ogilvy беше прогласен за најдобра агенциска мрежа во Азија, Латинска Америка и Северна Америка, додека TBWA Worldwide триумфираше во Европа. McCann ја освои титулата во регионот MENA, а Leo беше прогласен за најдобра мрежа во Пацификот и во Субсахарска Африка.
Во конкуренцијата на независните агенциски мрежи, признанието „Independent Network of the Year“ му припадна на Rethink, пред Mother и Wieden+Kennedy. Успехот на Rethink продолжи и во категоријата „Independent Agency of the Year“, каде агенцијата од Торонто го освои првото место, пред Isle of Any од Њујорк и Mother од Лондон.
За „Agency of the Year“ беше прогласена LePub од Милано, второто место го освои VML од Њујорк, а третото Rethink од Торонто.
Во категоријата „Creative Brand of the Year“, признанието му припадна на Heineken, пред KitKat и IKEA, како брендови што во текот на фестивалот се истакнаа со највисоко ниво на креативност и иновативност.
Наградата „Palme d’Or“, која се доделува на најуспешните продукциски компании, годинава ја освои MJZ од Соединетите Американски Држави. Второто место го зазеде Biscuit Filmworks од Обединетото Кралство, а третото CANADA од Шпанија.
Во категоријата „In-house Agency of the Year“ триумфираше Apple од Купертино, пред Google Creative Lab од Маунтин Вју и L’Oréal од Њујорк.
