Сојузот APIG (Alliance de la Presse d’Information Générale), кој застапува повеќе од 300 француски весници и списанија, се спротивстави на едностраното воведување на AI резимеата на Google без претходни консултации. Издавачите побараа од државниот регулатор да донесе одлука слична на онаа за компанијата Meta, односно да го обврзе Google да изработи план за плаќање и да ги продолжи преговорите со традиционалните медиуми кои бараат надомест за користење на нивната содржина во алатите со вештачка интелигенција.
Главниот мотив за оваа иницијатива се податоците од францускиот регулатор за комуникации ARCOM, според чии проценки сообраќајот на веб-страниците на весниците паднал за 33 до 38 проценти директно поради резимеата што ги генерира вештачката интелигенција. Претседателот на APIG, Марк Феје (Marc Feuillée), истакна дека фактот што вештачката интелигенција се гради врз медиумска содржина значи само едно, дека тие информации имаат значителна вредност, поради што издавачите бараат таа вредност соодветно да се подели.
Ова не е прв правен спор меѓу француските медиуми и технолошкиот гигант. Пред четири години, регулаторот за заштита на конкуренцијата го принуди Google да плаќа надомест за користење на статии од француските весници на своите платформи, а по долготрајниот спор за авторски права, компанијата беше казнета со 500 милиони евра.
Од APIG во своето соопштение нагласуваат дека едностраното воведување нови начини на користење на новинарските содржини, без претходно одобрение или плаќање надомест, директно ги занемарува претходно преземените законски обврски. Овој чекор на француските издавачи претставува нов притисок врз технолошките компании во Европа, кој би можел да постави значаен преседан за начинот на кој глобално ќе се регулира односот меѓу медиумските содржини и вештачката интелигенција.
Зошто е важно?
Падот на веб-сообраќајот од 33% до 38% поради AI резимеа претставува закана за бизнис-моделот на дигиталните медиуми, а францускиот регулаторен притисок може да постави преседан за целата медиумска индустрија.
