Хрватска комуникациска кампања која ја слави убавината и звуците на природата освои едно од најпрестижните светски признанија во областа на односите со јавноста. Кампањата „Најубавата приказна од природата“, реализирана од CTA komunikacije за брендот природна минерална вода Cetina, ја доби наградата “IPRA Golden World Awards for Excellence” во категоријата за успешно интегрирање на традиционалните и новите медиуми.
Наместо производот да биде во центарот на вниманието, кампањата го истакна природното богатство на Паркот на природата „Динара“, од каде што извира водата. Преку релаксирачки ASMR-звуци од ветер, птици и жуборење на вода, публиката доби можност да ја доживее природата на поинаков и поавтентичен начин.
Но, проектот не се задржа само на обичен телевизиски видеоспот. Беше создаден и првиот хрватски подкаст во кој главен „водител“ е природата, а на социјалните мрежи беа претставени мелодии создадени од електричните сигнали на растенијата. Кампањата беше дополнета и со дневник на благодарност, изработен во соработка со психологот Јелена Чубелиќ, со цел да ги поттикне луѓето да се оддалечат од секојдневниот метеж и повторно да се поврзат со природата.
Кулминацијата на кампањата беше интерактивното ASMR-доживување поставено во историскиот тунел Грич во Загреб, кој беше претворен во „оаза на мир“. За само пет дена ова искуство го посетиле повеќе од 11.500 луѓе, што покажува дека јавноста силно ги препознава креативните и иновативни начини на раскажување приказни инспирирани од природата.
Според Гордан Турковиќ, извршен директор на CTA komunikacije, наградата е признание за тимската работа и за доследното спроведување на една креативна идеја низ сите комуникациски канали. Со ова меѓународно признание, агенцијата уште еднаш ја потврди својата репутација како креатор на иновативни кампањи што успешно ги обединуваат креативноста, стратешкото размислување и мерливите резултати.
