Македонската комуникациска индустрија годинава доби свое претставување на регионалниот фестивал „Дани комуникација“ во Ровињ, каде Предраг Николовски, ко-основач и креативен директор на AdValue, одржа презентација за состојбата, трендовите и потенцијалот на домашниот пазар.
Во разговор за Marketing365, Николовски зборува за клучните пораки што ги пренесе пред регионалната публика, за предностите и предизвиците на македонската маркетинг сцена, за трансформацијата на агенцискиот бизнис во ерата на вештачката интелигенција, како и за визијата што, според него, треба да ја следи индустријата во годините што доаѓаат.
Неговата порака е јасна – иако сме мал пазар, Македонија има знаење, талент и потенцијал да создава кампањи и брендови кои можат да бидат препознаени и надвор од домашните граници.
Маркетинг365: На фестивалот „Дани комуникација“ во Ровињ ја претставивте македонската комуникациска индустрија пред регионалната публика. Кои беа клучните пораки што сакавте да ги испратите и како беше примена презентацијата?
Предраг Николовски: Клучните пораки кои можеа да се извлечат од мојата презентација „македонскиот пазар како еспресо“, се дека тој е мал, густ и има силен ефект, токму како еспресото. Презентацијата беше ориентирана кон фактите за пазарот кои ни кажуваат дека пазарот расте, дигиталните канали растат полека но сигурно, а најбрзо јуриша е-трговијата. Особен фокус дадов на дигиталниот маркетинг со кој ние како AdValue посебно се занимаваме. Додека од една страна постојат многу мини дигитални маркетери и креатори, јас се фокусирав на компаниите кои создаваат дигитален маркетинг што создава вредност. Ова побуди сериозен интерес кај колегите бидејќи во добар дел бевме и пред повеќето други пазари во овој сегмент. Дефинитивно сме единствени во регулацијата на контент креаторите односно инфлуенсерите, и со тоа сме едни од единствените во ЕУ. Околу дигиталната комуникација она што истакнав е дека суштината не е да се сними рил со вработени, туку да се направи стратешко препознатливо дигитално присуство кое ќе работи (читај носи резултати) позитивно на брендот на долг рок. Презентацијата очекувано беше прифатена со насмеани лица бидејќи низ целата се протегаше онаа паралела на еспресо и нашиот маркетинг пазар.
Маркетинг365: Од денешна перспектива, каде се наоѓа македонската маркетинг и комуникациска индустрија во споредба со земјите од регионот? Во што сме најсилни, а каде имаме најголем простор за напредок?
Предраг Николовски: Иако земјите од регионот кои можевме да ги погледнеме на панелот се разликуваат по доста работи, предизвикот кај повеќето останува ист, затворени пичови, корупција, нелојална конкуренција. Мојата идеја беше да се фокусираме на позитивното односно да го истакнам она што е позитивно за Македонскиот пазар. Затоа иако сме најмал во споредба со останатите земји од регионот се носиме сосема солидно и сме пазар кој во моментов е најбрзорастечки од аспект на квантитет на создавање.Идејата и целосниот концепт и дигитален печат на брендот е многу повеќе и покомплексно дури и од традиционалните маркетинг форми, секој медиум/канал бара свој израз/формаТ, а сериозно дигитално присуство бара соодветен буџет. Ако некогаш се подготвувала кампања и снимала една реклама и адаптации од истата, денес е потребно да креираме многу поголем обем на материјали во многу пократок рок. Маркетинг индустријата има што да даде, време е македонските компании да го искористат тоа.
Маркетинг365: Како ко-основач на AdValue, веќе години наназад сте дел од развојот на домашната сцена. Како според твоето видување се менуваат клиентите и нивните очекувања низ годините?
Предраг Николовски: Домашната сцена од аспект на тоа како ја гледаат клиентите би рекол дека е многу зависна од трендови. Фокусот од традиционалните комплетно се префрли кај дигиталните канали. Тоа значи дека сега секој корисник знае како треба да се работи нашата работа и има видено што е „јак маркетинг“. Секако ова предизвикува одреден предзвик за сите професионалци во нашата индустрија бидејќи мораат да се борат со овие ставови и колку и да не веруваат во истите решенија да најдат компромис за да испорачаат резултати. Бидејќи претпоставувам веќе е јасно доколку нема резултати дека вината е кај маркетинг тимот. Се повеќе клиенти се повлекуваат од пристапот плати двајца инфлуенсери или ќе стисне „буст“ колешката од сметководство, а се буџетираат соработки со маркетинг агенции кои го прават тоа правилно се своевиден надворешен маркетинг сектор докажано носат ефект за брендот и продажбата.
Маркетинг365: Денес многу се зборува за вештачката интелигенција, автоматизацијата и новите дигитални алатки. Како тие ја менуваат работата на една современа маркетинг агенција?
Предраг Николовски: Во голема мера ја менуваат. Иако идејата и она што ќе Ве издвои мора да биде човечко, посебно во море на генерички објави. Со паметно користење на човечкиот ум, гаење креативна комуникација, истражување, адаптаирање и комбинирање на современи техонологии АИ алатките може да бидат сериозен партнер. Секој кој ги користи има предност, несомнено. Ние многу сакаме да ги користиме и да се занимаваме со нив. Создаваме многу решенија со АИ во секојдневната работа. Ги комбинираме со редовните алатките кои ги користиме со години и така доаѓаме до квалитетни решенија. Наспроти едноличните креативи со минимум 2 печатни грешки (имаш приметено знам). Кога го гледаме АИ од аспект на канал на комуникација, би го споредил со револуцијата на интернетот. Додека од креативен аспект е само уште една „моќна“ алатка, која може да научи, но не може да ПОЧУВСТВУВА бренд, тон, порака и комуникација.
Маркетинг365: Што, според Вас, ја прави една агенција успешна денес? Дали креативноста сè уште е клучниот фактор или успехот сè повеќе зависи од стратешкото размислување и деловните резултати?
Предраг Николовски: Комбинација од двете е императив за работата да биде успешна а со тоа и агенцијата. Па затоа најважно е да се постави стратегијата на здрави столбови, да бидат РЕАЛНИ и агенцијата и клиентот, па потоа да се создаде креативна комуникација која ќе се тестира согласно таргет, само така ќе се постигнат вистински резултати. Многу често добрите идеји и кампањи звучат и изгледаат „милионски“ меѓутоа работат само на имиџ додека резултатот на контото останува непроменет. Тука се мери успехот на нашата работа односно тоа е клучниот фактор, да направиме комуникација која ќе биде квалитетна и ќе донесе резултат на двете конта. (бренд и цифри)
Маркетинг365: Ако треба да издвоите еден тренд што ќе има најголемо влијание врз комуникациската индустрија во следните пет години, кој би бил и зошто?
Предраг Николовски: Дефинитивно одиме уште по длабоко во дигиталното. АИ (веќе 7 пати спомнато) или тој таканаречен генеративен контент GEO, кои веќе го работиме како екстензијата на она што значеше SEO. Ќе ни пристигнат нови формати мислам дека вокалните пораки ќе се зголемат, кратките видеа ќе царуваат уште долго. Околу креативниот аспект многу наскоро (додека да отвориш Фејбуск) ќе се преплавиме со објави што изгледаат исто. Па затоа сосема контраинтутивно ова повторно ќе ја врати топката кај креативците кои знаат како да креираат приказна.
Маркетинг365: Македонската индустрија има таленти кои освојуваат регионални и меѓународни признанија. Што треба да направиме како пазар за да создадеме уште повеќе успешни приказни и да бидеме поконкурентни на меѓународната сцена?
Предраг Николовски: Македонија во однос на креативни индустрии многу пати докажа дека има огромен потенцијал. Она што ни треба се повеќе регионални соработки и кампањи, конкретно ние добивме признание за кампања која ја работевме за брендот MG Motor на ниво на неколку држави. Ова ни даде можност да излеземе од рамките на нашиот пазар и буџетски и во однос на идеи кои резонираат со публики во регионот и надвор од него. Моја некоја, патриотска желба е да видам повеќе домашни брендови кои заедно со тимови како нашиот прават маркетинг кампањи наградени надвор од земјата и кои градат брендови поголеми од нашиот пазар. Тука гледам огромен неискористен потенцијал за нас како маркетери и за нашите компании. Маркетингот не е трошок туку најважна инвестиција, светските брендови добро го знаат тоа, време е и ние да го научиме. Не можете да се натпреварувате со Бамби, Кока Кола, Подравка, а маркетинг буџетот да го трошите на едно дете што разбира Фејсбук и инстаграм и колешка од кадрово што стиска буст. (мораше уште еднаш)
Маркетинг365: Каква би сакале да биде македонската маркетинг и комуникациска индустрија за пет години и што е потребно да се случи за таа визија да стане реалност?
Предраг Николовски: Македонската маркетинг индустрија допрва има што да каже. За 5 години би сакал повеќе да соработуваме и да правиме големи моќни кампањи за кои ќе чуе светот и светските брендови. Да креираме комуникација која ќе охрабрува, ќе ги води децата кон подобро, ќе предизвикаме ланчана реакција на среќа и радост. Сакам да излеземе од мајндсетот на мали играчи, и да влеземе во еспресо мајндсет на маркетери кои креираат искуство, приказна и ефикасност за клиентот. Баш онака како што бара и налага новото време. Македонскиот начин е од ништо да создадеш магија – Од тапан и зурла моќна музика, од гравче и пиперка специјалитет тоа очекувам да го гледам и во мојата индустрија.
