Автомобилскиот бренд Hyundai и агенцијата McCann Greece започнаа кампања во Атина со која преку дигитални рекламни екрани ги предупредуваат граѓаните за опасностите од возење под дејство на алкохол.
Секоја вечер во 22 часот, избраната реклама на Hyundai се менува од слика на вообичаен автомобил во приказ на искршен автомобил, проследено со порака со која возачите се повикуваат добро да размислат пред да седнат зад воланот по консумирање алкохол.
Кампањата е поставена на некои од најфреквентните локации во атинските подрачја со интензивен ноќен живот, како и на патиштата што го поврзуваат центарот на градот со популарните места за ноќна забава покрај брегот. Иницијативата се реализира во период кога грчката сообраќајна полиција значително ги зголеми контролите за присуство на алкохол кај возачите, со повеќе од еден милион алкотестови спроведени минатиот месец.
Наместо да закупува нов огласувачки простор, тимот ги користи постојните дигитални екрани на Hyundai. Во текот на денот тие ги промовираат автомобилите на брендот, додека подоцна во текот на ноќта се претвораат во предупредување против возење под дејство на алкохол. Од McCann Greece велат дека со овој пристап истиот медиумски простор може да се искористи за две различни пораки.
Идејата се потпира на психолошкиот ефект познат како „нарушување на очекувањата“. Луѓето се навикнати на овие екрани да гледаат огласи за автомобили, па ненадејната појава на искршени автомобили создава неочекуван контраст. Целта е промената да го привлече вниманието на публиката и да ги поттикне луѓето да размислат пред да седнат зад воланот.
