Дигитализацијата денес претставува неразделен дел од процесот на европска интеграција, а развиената инфраструктура и сигурните комуникациски системи се меѓу најважните предуслови за стабилност и отпорност на државите. Ова го истакна првиот заменик-претседател на Владата и министер за европски прашања, Беким Сали, на отворањето на меѓународната конференција за јавна радиодифузија што се одржа Скопје.
Според Сали, темите опфатени на конференцијата ги одразуваат најзначајните современи трендови и предизвици во областа на радиодифузијата и телекомуникациите, меѓу кои се 5Г технологијата, мрежното поврзување, облак-услугите, кибербезбедноста и енергетската ефикасност.
Тој нагласи дека европската интеграција не се темели единствено на законски и политички реформи, туку и на изградба на квалитетна дигитална инфраструктура и силна поврзаност. Таквите системи, рече тој, се неопходни за информирано општество, заштита на демократските процеси и обезбедување сигурна комуникација во кризен период.
Министерот посвети внимание и на потребата од заштита и одржливост на критичната инфраструктура, што станува сѐ позначајна тема во Европската Унија, особено во контекст на дигиталната безбедност и заштитата на телекомуникациските мрежи.
Осврнувајќи се на технолошкиот развој, Сали истакна дека вештачката интелигенција и облак-решенијата отвораат нови перспективи за поефикасни и понапредни системи во радиодифузијата и комуникацискиот сектор. Тој додаде дека Македонија останува посветена на усогласување со европските стандарди и на создавање современ дигитален екосистем.
Заменик-министерот за дигитална трансформација, Радослав Настасиевиќ-Варџиски, оцени дека денес поврзувањето, радиодифузијата и дигиталните услуги претставуваат заедничка основа на модерните економии и отпорните општества. Според него, во време на интензивна дигитализација, улогата на инфраструктурата е поважна од кога било досега.
Тој потенцира дека современите комуникациски мрежи претставуваат клучен двигател за функционирањето на институциите, економијата и секојдневниот живот, додека радиодифузната инфраструктура останува еден од најсигурните сегменти во комуникацискиот систем, особено во услови на кризи.
Настасиевиќ-Варџиски информираше дека Министерството веќе спроведува конкретни активности во насока на стратешко планирање, унапредување на дигиталните услуги, подобрување на интероперабилноста и поврзаноста, како и усогласување со европските регулативи.
Тој истакна дека понатамошниот развој зависи од тесната соработка помеѓу институциите и технолошките партнери, додавајќи дека новите платформи создаваат простор за иновации и поголема ефикасност, но бараат јасна визија, координација и соодветни политики.
Директорот на ЈП Национална радиодифузија, Јусуф Сопи, нагласи дека радиодифузијата е многу повеќе од технологија и претставува важна врска меѓу луѓето, изградена врз доверба, вистина и комуникација.
Потсетувајќи на развојот на радиото од крајот на 19 век, Сопи рече дека првите антени и радиопреноси го означиле почетокот на процесот на надминување на географските бариери и поврзување на луѓето ширум светот.
Според него, развојот на радиото, телевизијата, сателитските технологии и интернетот постепено ги избришал границите и создал глобален простор за размена на информации и идеи. Сепак, суштината на радиодифузијата останува во човечкиот фактор и довербата што се создава преку директната комуникација.
Сопи оцени дека токму живиот глас овозможува создавање блискост и доверба меѓу луѓе кои никогаш не се сретнале, што ја претставува вистинската сила на радиодифузијата. Тој порача дека современите предизвици бараат храброст, визија и непоколеблива посветеност кон вистината како основна вредност на медиумите.
Претседателот на Здружението MBT, Михаел Јанчиќ, истакна дека радиодифузијата не подразбира само пренос на содржини, туку и создавање стабилни комуникациски системи што ќе им служат на граѓаните, особено во кризни ситуации.
Тој потсети дека приклучувањето на Националната радиодифузија кон MBT минатата година претставува значаен чекор за јакнење на регионалната и меѓународната соработка и за проширување на влијанието на организацијата.
Во рамките на конференцијата беа разгледани теми поврзани со дигиталната трансформација на медиумите, развојот на јавниот сервис и унапредувањето на професионалните стандарди во радиодифузниот сектор.
MBT-конференцијата претставува еден од најзначајните регионални настани во оваа област, кој секоја година ги обединува радиодифузерите, институциите и производителите на техничка опрема со цел размена на искуства, знаења и унапредување на професионалната и технолошката соработка.
