23-то издание на меѓународната конференција PRO PR, што ќе се одржи во Подгорица, ќе обедини експерти од регионот и од светот, со фокус на стратешката улога на комуникациите во јавниот и во приватниот сектор
Во услови кога комуникациската индустрија се приспособува на новите технологии, промените во публиката и сè покомплексното деловно опкружување, прашањето за стратешката улога на односите со јавноста повторно доаѓа во преден план.
Водечката меѓународна конференција PRO PR и оваа година ги собира експертите од регионот и од светот со цел размена на знаења и зајакнување на професионалните стандарди во областа на односите со јавноста и интегрираните комуникации. 23-то издание на конференцијата ќе се одржи во Hilton Подгорица, каде што во текот на тридневната програма ќе бидат обработени актуелни теми од јавната управа и од приватниот сектор.
Конференцијата ќе ја отвори проф. Џастин Грин, претставник на Global Alliance for Public Relations and Communications Management од Ирска, а меѓународниот карактер на настанот дополнително се потврдува со учеството на предавачи од Италија, Обединетото Кралство, Германија, Турција, Индија, Франција и Унгарија, како и комуникациски експерти од регионот – Словенија, Хрватска, Босна и Херцеговина, Србија и Црна Гора.
PRO PR е специфична и по институционалната поддршка на професијата – станува збор за единствена конференција во светот под покровителство на четири водечки меѓународни здруженија: PRCA (Public Relations and Communications Association), IPRA (International Public Relations Association), WCFA (World Communications Forum Association) и Global Alliance. Од оваа година, конференцијата се бодува и на глобално ниво преку програмата CIPR CPD за континуиран професионален развој.
Организатор на конференцијата е Данијел Колетиќ, сопственик на агенцијата Apriori World, која ја објави финалната верзија на програмата. Мисијата на PRO PR останува поврзувањето на експертите од областа на односите со јавноста и пошироката комуникациска индустрија, вклучително и професионалците кои учествуваат во интегрираните комуникациски процеси.
Преку едукација, размена на искуства и вмрежување, конференцијата настојува да придонесе за развојот на професијата и за создавање нови професионални вредности, а повеќе информации за конференцијата и програмата се достапни на официјалната веб-страница.
