Медиумската и телекомуникациска групација United Group постигна договор за продажба на своите информативни медиуми во Босна и Херцеговина, Хрватска, Црна Гора, Србија и Словенија на Alpac Capital, инвестициската групација која поседува мнозински удел во Euronews.
Предмет на аквизицијата е Adria News Network (ANN) – медиумска мрежа формирана претходно оваа година со цел обединување на информативните медиумски операции на United Group во петте погоре споменати земји. Во нејзин состав се наоѓаат некои од најпознатите регионални медиумски брендови, меѓу кои N1, Nova S, Vijesti и Danas, кои заедно допираат до повеќе од 16 милиони луѓе и вработуваат над 1.000 новинари и медиумски професионалци.
Од Alpac Capital додаваат дека оваа аквизиција е во согласност со нивната долгорочна определба за поддршка на независно и фактографски засновано новинарство. Компанијата нагласува дека искуството стекнато преку мнозинската сопственост во Euronews претставува цврста основа за понатамошен развој и стабилност на ANN.
Според двете компании, Alpac Capital била избрана меѓу неколку заинтересирани инвеститори кои доставиле понуди по формирањето на мрежата. При изборот, покрај финансиската вредност на понудата, важна улога имале и заложбите за зачувување на принципите на управување и уредувачката независност воспоставени при создавањето на ANN.
Договорот содржи механизми за заштита на уредувачката автономија, јасно раздвојување на уредувачките и комерцијалните активности, како и задржување на независен надворешен советодавен надзор.
Доколку бидат добиени сите потребни регулаторни одобренија, трансакцијата се очекува да биде финализирана во втората половина на 2026 година, додека United Group ќе продолжи да се фокусира на развојот на своите телекомуникациски и медиумски бизниси на клучните европски пазари.
