Меѓународниот фестивал на креативноста Cannes Lions ги објави добитниците во категориите „Creative Data Lions“, „Media Lions“, „Direct Lions“, „PR Lions“ и „Social & Creator Lions“ на третата свечена церемонија за доделување награди на овогодинешното издание, одржана во живо во Кан.
„Победничките проекти од третата вечер уште еднаш ја покажуваат моќта на креативноста да поттикнува раст за бизнисот, луѓето и општеството во целина. Повторно им благодариме на нашите исклучителни жири-комисии што го поставија глобалниот креативен репер за индустријата“, изјави Сајмон Кук, извршен директор на LIONS.
Во категоријата „Creative Data Lions“, која ја слави трансформативната моќ на креативноста поткрепена со податоци, беа примени 391 пријава, а жирито одлучи да додели 13 награди: 2 златни, 4 сребрени и 6 бронзени. Гран при наградата ја освои „SOS POS“ за BCP, реализирана од Circus Grey од Лима, Перу. Станува збор за алатка наменета за жртви на кражба на мобилни телефони, која ги претвора стандардните POS терминали во точки за блокирање на банкарски сметки и достигна повеќе од 34 милиони жители на Перу.
Во категоријата „Media Lions“, каде се наградува контекстот на креативноста, биле прифатени 1.432 пријави, а жирито одлучи да додели 45 награди: 7 златни, 16 сребрени и 21 бронзена. Гран при наградата му припадна на проектот „Build Your Own Super Bowl“ за Uber Eats, реализиран од агенцијата Special од Лос Анџелес. Станува збор за првиот ресторан во светот создаден во рамки на апликација, кој им овозможи на навивачите сами да ја креираат својата реклама за Super Bowl, привлекувајќи нова публика и рекордни продажни резултати.
Во „Direct Lions“, кои ја наградуваат насочената и резултатски-ориентирана креативност, беа примени 1.325 пријави, а доделени се 42 награди: 7 златни, 13 сребрени и 21 бронзена. Гран при наградата ја освои „Uva Uva Bombón“ за UVA App, изработена од De la Cruz Ogilvy од Сан Хуан, Порторико. Апликацијата UVA успеала да го искористи огромното внимание што го предизвика настапот на Bad Bunny на Super Bowl, претворајќи го глобалниот културен момент во непосредна акција од потрошувачите.
Во категоријата „PR Lions“, која ја слави уметноста на стратешката и креативна комуникација, беа примени 1.156 пријави, а доделени се 37 награди: 7 златни, 12 сребрени и 17 бронзени. Гран при наградата ја освои „The KitKat Heist“ за KitKat, реализирана од агенцијата Burson од Лондон. Проектот ја подобри перцепцијата за брендот преку претворање на кражба на KitKat во глобален повик за акција.
Во „Social & Creator Lions“, кои ги наградуваат креативното размислување за социјалните мрежи и стратешките инфлуенсерски маркетинг решенија, беа примени 1.413 пријави, а доделени се 44 награди: 8 златни, 14 сребрени и 21 бронзена. Гран при наградата му припадна на проектот „Could Have Been a Heineken“ за Heineken, реализиран од LePub од Милано. Кампањата ги претвори гласовните пораки на WhatsApp во покана за повторно поврзување меѓу луѓето, наградувајќи ги оние што ќе се оддалечат од екраните и ќе споделат пиво во живо.
Доделени беа и специјални признанија. За „Media Network of the Year“ првото место го освои Carat, пред OMD Worldwide и PHD Worldwide.
Наградата „PR Agency of the Year“ му припадна на Burson од Лондон, пред Golin Ketchum од Лондон и Ninch Company од Буенос Аирес.
Сите финалисти и добитници се достапни за разгледување на платформата The Work. Повеќе информации за фестивалот се достапни на canneslions.com.
