Малите бизниси играат важна улога во економијата. Додека различни фактори може да влијаат врз потенцијалот за профит на бизнисот, една од најважните фактори е стратегијата за цени која се користи од страна на сопствениците.
Добрите ценовни стратегии може да ви помогнат да ги детерминирате точките во кои може да ги максимизирате профитите од продажба на вашите производи или услуги.
Кога ги креира цените, сопственикот на бизнисот треба да размисли околу широк ранг на фактори, меѓу кои се вбројуваат производството и трошоците за дистрибуција, понудите на конкурентите стратегиите за позиционирање, како и таргет публиката на потрошувачи на производите/услугите на бизнисот.
Можеби потрошувачите нема да купат некои добра со превисока цена, меѓутоа компанијата нема да успее и доколку цените на нејзините добра се премногу ниски и не ги задоволуваат продукциските трошоци. Покрај производот, дистрибуцијата и промоцијата, цената може да има значаен ефект врз успехот на вашиот мал бизнис.
Ова се неколку стратегии кои бизнисите ги имплементираат кога ги поставуваат цените за своите производи и услуги.
1. Премиум цени
Со премиум цени, бизнисите ги поставуваат трошоците на повисоко ниво за разлика од своите конкуренти. Оваа стратегија е доста успешна во раните периоди на развојот на производот во рамките на неговиот животен циклус и е идеална стратегија за мали бизниси кои продаваат уникатни добра на пазарот.
Потрошувачите мора да ги перцепираат производите како добра кои се вредни за повисоката цена која ја плаќаат, а со тоа бизнисите мора да работат повеќе со цел да креираат вредност и перцепција за истата кај производот.
Покрај креирањето на производ со висок квалитет, сопствениците потребно е да се осигураат дека пакувањето на производот, како и изгледот на самата продавница, се во согласност со целиот концепт за премиум цена на производот.
2. Цени за влегување на пазарот
Стратегиите за влез на пазарот имаат за цел да ги привлечат купувачите преку понуда на пониски цени на добрата или услугите. Иако голем број на компании ја користат оваа техника со цел да привлечат внимание на себе и да го одвлечат истото од своите конкуренти, ваквиот пристап може да доведе до иницијални загуби за приходот на бизнисот.
Со текот на времето зголемувањето на свесноста за брендот може да генерира профит и да му помогне на малиот бизнис да генерира профит и да се издвои од останатите конкурентина пазарот. На долг рок, откако доволно ќе биде познат на пазарот, брендот може да направи постепено зголемување на цените кои најдобро би ги рефлектоирале неговите позиции на пазарот.
3. Поставување на економски цени
Оваа ценовна стратегија се користи од широк ранг на бизниси кои вклучуваат генерички доставувачи на храна, како и дисконтни продавници и има за цел да ги привлече потрошувачите кои се свесни за понудата и цените на пазарот. Со оваа стратегија бизнисите ги минимизираат трошоците поврзани со маркетинг и производство, со цел да ги одржуваат цените на производите ниски. Како резултат на тоа, потрошувачите може да го набават бараниот производ по ниска цена. Ваквиот тип на ценовно позиционирање има одличен ефект за компании кои се големи, на пример голем ланец на маркети и слично, додека пак, за мали бизниси ова може да биде многу ризичен чекор, затоа што нив им недостига волуменот на продажба на големите компании и може да се соочат со проблеми околу недоволното генерирање на профит кога цените им се премногу ниски. Сепак ‘’играњето’’ со некои ниски дисконтни цени може да ви донесе лојални потрошувачи и на долг рок да ви ја донесе нивната доверба.
4. Играње со цени
Оваа стратегија е направена со цел да им помогне на бизнисите да ја зголемат својата продажба на производи и услуги. На почетокот, цените се високи за време на иницијалната фаза на лансирање на производот, а потоа компанијата ги намалува цените постепено со појавата на конкурентни добра на пазарот.
Еден од бенефитите од играта со цени е тоа што им овозможува на бизнисите да го максимализираат својот профит на почетокот, за подоцна поради адаптацијата на пазарот да имаат потреба да ги снижуваат цените со цел да привлечат потрошувачи кои се сензитивни на ценовните понуди.
Ваквата ценовна стратегија воедно креира илузија на квалитет и ексклузивност кога производот се појавува на пазарот.
5. ‘’Психолошки цени’’
Цената е важен фактор во процесот на купување во една ваква економија. Психолошкото поставување на цените се однесува на техники кои бизнисите ги користат со цел да ги охрабрат потрошувачите да реагираат на емоционално ниво, наместо на рационално.
Да земеме еден пример: цената 899 денари е цена која докажано би привлекла повеќе потрошувачи за разлика од цената 900 денари, иако разликата е незначителна. Како би го објаснале овој тренд? Потрошувачите имаат тенденција да бидат привлечени од првата бројка на цената наместо на последната. Целта на психолошкото поставување на цени е да ја зголеми побарувачката, со креирање на илузија на зголемена вредност за потрошувачот.
6.Пакет цени
Со цените за купување на повеќе производи во пакет, малите бизниси може да продадат повеќе производи за пониска цена доколку потрошувачите би го купувале секој производ индивидуално. Не само што станува збор за одлична стратегија и ефективен начин за продажба на непродадени производи кои ви одземаат простор на полиците, во исто време ваквата стратегија може да ја зголеми перцепцијата за вредноста на ваквиот пристап во очите на потрошувачот, затоа што веќе давате нешто гратис/бесплатно. Ваквиот пристап е одличен за бизниси кои продаваат комплементарни производи.
На пример, една компанија за козметика може да добие предност во продажбата на поскапи производи намалувајќи ја во пакет вредноста на некој поефтин производ, со цел да се продадат поскапите производи.
