Пишува: Наташа Божиновска Миркова, Директор на Represent Communications Скопје
Да се биде дел од еден настан како што е #WebSummitLisbon со преку 70,000 посетители од целиот свет, повеќе од 1,200 предавачи и преку 2,500 новинари, каде родовата еднаквост е застапена со 46.3% од сите присутни да бидат жени во денешно време кога тоа е сеуште борба, секако дека е привилегија. Да се биде дел од настан каде се споделуваат најновите трендови и очекувања во дигиталниот свет за следната 2020 година е исто така предност која ќе ми биде чест да ја споделам. Оваа година, Represent Communications беше присутен со тим од 6 луѓе на ниво на систем.
Самиот факт што овој настан има капацитет да прими преку 70,000 посетители и преку 1,200 предавачи укажува на големината на Самитот и секако, предавањата кои беа на дофат. На самото отворање на настанот се вклучи Едвард Сноуден директно од Русија преку видео линк каде зборуваше за тоа дека најважните институции во општеството се сметаат за помалку важни одошто навистина се. Дигиталната трансформација, како тема на овој Самит ја долови својата важност преку најразлични примери и предавачи каде разбравме дека силата на дигиталната трансформација доколку ја адаптираме соодветно во нашето работење, може да претставува револуција за нашата работа.
За дигиталната трансформација зборуваме веќе извесен период последниве години. Важноста и имплементацијата на истата во нашата индустрија е повеќе од потребна. Подемот со инфлуенсерите кои работат за различни брендови е очекуван, бидејќи тие всушност креираат содржина и на тој начин комуницираат со публиката, изјави Ијан Сомерхалдер, познат актер кој е директно вклучен во креирањето на содржини за различни компании. Неговиот осврт на прашањето дали ќе биде возможно да се изгради нов бренд, имајќи во предвид колку се социјалните медиуми преплавени со секакви брендови и производи, одговорот го насочи во правец на тоа дека, тоа што ќе ги издвојува новите брендови или производи помеѓу останатите ќе биде развивањето на “live experiences” во форма на кратки видеа или анимации кои ќе бидат привлечни за преглед. “Автентичност, искреност и солидна фреквенција на квалитетна содржина која луѓето ќе ја ценат. Совршенството е најголемиот непријател на доброто на каналот YouTube” се зборовите на Ијан Сомерхалдер во однос на очекувањата за следната година. Во однос на стратегискиот поглед на бизнисот, за него претставуваат 3 клучни столбови, односно Луѓето, Животната средина и Профитот – консументите не сакаат ништо помалку од тоа. Бизнисите кои ќе опстанат ќе мораат да ги следат овие три принципи за да егзистираат.
Иднината на инфлуенсерите повторно се наоѓа во фокусот преку импактот на социјалните медиуми. Премногу ликови, премногу следбеници од кои сериозен процент и вештачка интелигенција. Ако минатата 2018 година во светот постоеле околу 4 милиони инфлуенсери, оваа година таа бројка е искачена на 9 милиони глобално што претставува многу тешка задача за компаниите да го изберат најдобриот според потребите. Она што ќе прави дистинкција помеѓу добрите и подобрите ќе биде повторно креирањето на содржина доволно атрактивна за паметење и привлекување внимание, и секако за понатамошно споделување. Потребата за поврзување со целната публика ќе се заснова на апсорбирањето на потребите на истата и креативноста која ќе се произведе за поголема интеракција. Зголемувањето на бројот на инфлуенсери кои работат со брендови значи креирање на содржина и директна комуникација со целната публика. Како добар пример беше посочена приказната на Walt Disney како компанија која има директен пристап до својата публика преку креирањето на содржини доволно атрактивни за нивните следбеници и секако, за општата јавност. Тие знаат како да искреираат добри приказни кои ќе бидат доволно атрактивни и видливи за општата публика, а со тоа да ги продадат своите производи ширум светот. Тие градат релација со целната публика на долги стази.
Во поглед на социјалните медиуми, истата приказна се пресликува и таму. Не е доволно да се има брендирана страница или да се плати спонзорирана кампања. Потребна е содржина доволно атрактивна, а не тоа што ние мислиме дека е адекватно. Социјалните медиуми всушност се третираат како “стан под кирија” во кој се вложува на краткорочно за да се добие моментална визибилност. Она што е иднината е всушност креирање на свој медиум преку добра содржина, а следствено на тоа и сообраќај од целната публика. Социјалните медиуми ќе се користат исклучиво за “push” ефектот и стигнување до потребните конзументи на пократкиот пат. Сепак, на долги стази она што се очекува е сопствен медиум за комуникација со содржина на дневно ниво која би се унапредувала со директен пристап за комуникација, креирање на навика за посета и развој на апликација за директна комуникација.
Употребата на апликациите е во постојан раст и денес завзема 55% од сите онлајн трансакции. Статистиките укажуваат на тоа дека пенетрацијата на апликациите е моментално 3 пати поголема од користењето на пребарувачите. Доколку брендовите не се адаптираат и комуницираат со своите конзументи на овој начин, растот на употребата на паметните телефони, а со тоа и апликациите нема да биде добра вест за нив.
Дигиталниот предизвик вели дека технологијата константно се менува и еволуира на начин потребен за следбениците, а шансите за монетизирање на содржината ќе значи делумно и експериментирање. Во превод, напаѓање на дигиталните платформи повторно со креирање на уникатна содржина (unique content) наменета за широката публика како би се освоиле повеќе следбеници, а подоцна пласирање на содржина со едукативен карактер наменета за конкретната целна публика. Очекувањата за дигиталните платформи и нивното користење за следната 2020 година се најмногу во правец на Instagram stories, TikTok & Pinterest, YouTube видеа. Содржина во форма на видео и анимација, доволно едноставна за преглед, без потреба од читање. Во продолжение, статичните банери ќе имаат континуиран пад во атрактивноста за разлика од напредните динамични банери кои веќе ги надминуваат статичните банери за 5 пати.
Претставник на The New York Times зборуваше за Storytelling and brands. Поентата во пристапот е детектирање на соодветна приказна за раскажување и начинот на кој истата ќе се пренесе. Да не се презентира брендот како протагонист во приказната, туку фокусот повторно да остане во поглед на очекувањата и потребите на целната публика на начин кој ќе го разберат и запаметат. “Не ги приморувајте децата да јадат сирова брокула или домат. Тие тоа не сакаат да го конзумираат. Најдете начин како да им го дадете истото во форма прифатлива за нив. Направете им смути, тие ќе го примат тоа на различен начин, како сок, а не како зеленчук од кој упорно бегаат”.
Големите компании со полна пареа креираат содржина и упорно повторуваат “Content is the King”. Дизајнот на содржините најчесто е инклузивен и флексибилен со различни точки на интерес. Приказните треба да имаат фокус на дигитална асистенција и глас разбирлив за широките маси бидејќи очекувањата се во 2021 година употребата на паметните телефони да завзема 72.9% од вкупната е-трговија.
#WebSummitLisbon беше збир на многу посетители од различни индустрии меѓутоа заклучокот за нашата, од сите панели, дискусии и предавања кои ги посетивме беше ист – Иднината е во сопствената содржина која ќе дава континуирано резултати на долги стази. Кампањската комуникација со потенцијалните купувачи е краткотрајна. Не инвестирајте погрешно!
