Веќе трета година со ред, Business Creative Report на AdForum претставува уникатна ранг-листа на најнаградуваните креативни кампањи во поединечни бизнис сектори.
Заснована врз база на резултатите од повеќе од 30 различни креативни наградни натпреварувања ширум светот, таа е единствената ранг-листа од својот вид. Составена е врз основа на сопствен систем на бодување, така што секое креативно натпреварување во светот добива коефициент од 1 до 5 врз основа на географската покриеност и бројот на пријавени кампањи. Специјалистичките натпреварувања, како оние во областа на луксузните брендови и автомобилскиот сектор, исто така добиваат повисок коефициент. Изготвениот извештај им овозможува на огласувачите и агенциите да ги мерат своите креативни резултати во однос на ривалите од истата бизнис сфера.
Оваа годината кон извештајот беше додадена и категоријата „Технологија“, покрај досегашните „Автомото“, „Луксуз и премиум“, „Здравје и убавина“, „Патување и туризам“, „Храна и пијалоци“, „Малопродажба“ и „Финансии и осигурување“.
Меѓу најнаградуваните агенции, BETC Paris го задржа првото место од претходната година во категориите „Луксуз и премиум“, како и AMV BBDO во „Здравје и убавина.“
Меѓу останатите најефективни агенции се најдоа и Forsman & Bodenfors во категоријата „Автомото“, Ogilvy Germany во „Патување и туризам“, CHE Proximity во „Финансии и осигурување“, како и Serviceplan во „Технологија“. Агенцијата FCB New York се најде на првото место во категориите „Храна и пијалоци“ и „Малопродажба.“
Листата на најдобри огласувачи ја сочинуваат: Volkswagen во „Автомото“, Diesel во „Луксуз и премиум“, Bodyform/Libresse во „Здравје и убавина“, Deutsche Bahn во „Патување и туризам“, Kasikornbank во „Финансии и осигурување“, Apple во „Технологија“, McDonald’s во „Храна и пијалоци“ и Burger King во „Малопродажба.“
Најнаградуваната кампања е „Viva La Vulva“ од AMV BBDO за Bodyform/Libresse. Таа доби скоро четири пати повеќе поени од второпласираната кампања во категоријата „Здравје и убавина“.
Покрај неа, кампањата на „The Whopper Detour“ од FCB New York за Burger King исто така продолжи со својот победнички поход, надминувајќи ги своите ривали во категориите „Малопродажба“ и „Храна и пијалоци.“
Може слободно да се каже дека 2019 беше година на иклузивноста и пристапноста. Кампањи како „Dot Mini“ од Serviceplan, „Story Sign“ од FCB Inferno, „ThisAbles“ и „Changing the Game“ од McCann Worldgroup, ги освојуваа срцата на жири-комисиите.
Извештејот е изготвев врз основа на резултатите од многубројни наградни настани со кои AdForum има склучено партнерство, вклучувајќи ги Cannes Lions, D&AD, Clio, Epica Awards, One Show, LIA, Eurobest, Adfest, Dubai Lynx, Golden Drum, FAB Awards, World Luxury Award и многу други.
Погледнете ја целосната листа на најдобри креативни изведувачи по индустриски сектор на следниот линк.
