Угледниот американски дневен весник „Вашингтон пост“ во понеделникот објави дека ќе отвори канцеларии во Европа и Азија, со што бројот на вработени ќе се зголеми на повеќе од 1.000 новинари, најмногу досега.
Со оваа меѓународна експанзија, весникот кој од 2013 година е во сопственост на мултимилионерот Џеф Безос, основачот на Амазон, се издвојува во американскиот медиумски простор, кој е силно погоден од економската криза, бидејќи повеќето медиуми сакаат да заштедат и да преминат од печатено во онлајн издание.
Вашингтон Пост планира да отвори редакции во Лондон и Сеул, за да може подобро да ги следи настаните 24 часа.
„Вашингтон Пост сака да им обезбеди на своите читатели ширум светот брз пристап до целосни информации во секое време“, се вели во соопштението на весникот.
Весникот се надева дека ќе го зголеми бројот на своите интернет претплатници и биде конкуренција со Њујорк Тајмс, кој има тим од најмалку 1.700 новинари и посветува посебно внимание на своите читатели во странство.
„Вашингтон пост“ исто така ќе отвори нови канцеларии во Сиднеј, Австралија и Богота, Колумбија, со што вкупниот број на странски подружници ќе се искачи на 26.
Ова ќе го зголеми уредничкиот одбор за 44 работни места и ќе го зголеми бројот на вработени на 1.010 новинари, што е најголем од 1877 година.
„Читателите ќе можат да уживаат во побогато, потемелно, побрзо, поразновидно и поиновативно новинарство. Тоа зборува за голема доверба во иднината на Вашингтон пост“, рече Марти Барон, главен уредник на весникот.
Сепак, во првата половина на 2020 година, беа укинати повеќе од 11.000 работни места во медиумите во САД, објави консултантската компанија Challenger, Gray & Christmas.
Ова е најлошата година за американските медиуми од економската криза во 2008 година, кога во медиумите беа укинати 14.265 работни места.
