TRT Balkans е нова дигитална новинска платформа на Турската радио и телевизиска корпорација (TRT) чие седиште ќе биде во Скопје, а ќе има и регионална канцеларија во Сараево. Новиот новински портал ќе има канали на осум различни јазици, и тоа: македонски, албански, турски, српски, хрватски, босански, англиски и бугарски јазик.
TRT Balkans главно ќе се фокусира на регионалните случувања, истовремено создавајќи оригинални дигитални содржини за своите платформи и канали на социјалните медиуми. Новиот медиум ќе презентира актуелни вести, тематски стории и други ексклузивни содржини преку видеа, документарни филмови, социјални картички и други мултимедијални формати.
Освен регионалните оригинални вести, TRT Balkans истовремено ќе се фокусира и на различни теми од целиот свет кои имаат директно или индиректно влијание врз балканската политика, економија, општество и култура.
Платформата се очекува да биде лансирана на почетокот од годинава, при што од TRT Balkans очекуваат да прераснат во водечки дигитален извор на вести во регионот.
