Француската луксузна модна групација Kering, сопственик на брендови како Gucci, Yves Saint Laurent и Balenciaga, отпочна ревизија на својот глобален медиски договор, открива адвертајзинг магазинот Campaign US.
Според истражувачката агенција COMvergence, групацијата Kering во 2020 година потрошила 139.5 милиони долари на медиски активности, меѓутоа според други извори на Campaign, таа бројка е многу поголема, односно изнесува 566 милиони долари на глобално ниво.
Актуелен медиски партнер на Kering е агенцијата Zenith, која ќе се бори за задржување на договорот. Неодамна, Zenith доби нови медиски договори со Hulu за територијата на САД и со Nestlé за територијата на Обединетото Кралство и Ирска.
Не е познато кои други агенции ќе се натпреваруваат за медискиот договор на Kering. Ревизијата ја води маркетинг консултантската компанија R3.
Под капата на групацијата Kering, покрај Gucci, Yves Saint Laurent и Balenciaga, се наоѓаат уште и брендовите: Bottega Veneta, Alexander McQueen, Brioni, Boucheron, Pomellato, Dodo, Qeelin, Ulysse Nardin, Girard-Perregaux и Kering Eyewear.
По забележаниот пад од околу 20% во првата половина на 2020, пазарот на луксузни производи се очекува уште оваа година да се врати на предпандемиското ниво од 2019 година.
