Агенциската групација WPP реши да направи значајни промени во структурата на својот медиски оддел Group M, од кои најзначајна промена ќе биде спојувањето на агенциите MediaCom и Essence во еден ентитет.
MediaCom со 8,000 вработени и Essence со 2,000 вработени ќе се спојат во новоформираниот гигант EssenceMediacom, кој ќе започне да работи со 10,000 вработени во 125 канцеларии ширум светот и финансиски обрт од околу 25 милијарди долари.
Новата компаниска структура ќе започне да се имплементира од 2023 година, со првичен фокус на големите светски пазари. Исклучок ќе биде Обединетото Кралство, каде MediaCom и Essence ќе продолжат да работат одделно поради конфликт на клиенти (MediaCom ја опслужува теливизијата Sky, а Essence ја опслужува BT).
Досегашниот глобален извршен директор на MediaCom, Ник Лосон, ќе ја задржи истата улога и во споената EssenceMediacom. Од друга страна, глобалниот извршен директор на Essence, Кијоко Матсушита, ќе биде назначен за генерален извршен директор на WPP во Јапонија.
Со ваквото реструктуирање, медискиот оддел на WPP, Group M, ќе има три главни агенции: EssenceMediacom, Mindshare и Wavemaker.
Глобалниот извршен директор на Group M, Кристијан Јул, изјави дека „поедноставување“ на медискиот оддел има за цел движење на раст, без кратење на трошоци или работни места. Group M вработува околу 42,000 луѓе и има финансиски обрт од над 50 милијарди долари.
