Неколку недели пред пазарното лансирање на новите хибридни модели на Prius и Prius Prime, јапонскиот автомобилски гигант Toyota отпочна обемна маркетинг кампања за американскиот пазар.
Кампањата е составена од пет телевизиски спотови кои ги нагласуваат „супериорните“ перформанси и дизајн на новите автомобили. „Стилот, перформансите и високотехнолошките карактеристики на целосно новите Prius и Prius Prime ќе редефинираат што потрошувачите мислат, чувствуваат и очекуваат кога ќе се сетат на Prius“ – посочува Лиса Матерацо, потпретседателка за маркетинг на Toyota за Северна Америка.
https://youtu.be/xV8qj6_rXt4
Спотовите се создадени од различни креативни агенции. Па така, агенцијата Saatchi & Saatchi ги создаде спотовите “Black Sheep” и “Shadow”. Во првата реклама, новиот црн Prius на Toyota е прикажан на градските улици помеѓу стадо од бели овци – сосем јасна порака за конкурентите. Во вториот спот, автомобилот се трка со сопствената сенка – бидејќи никој друг не може да го стигне.
https://youtu.be/KRsA6-ds0vY
Агенцијата Conill Advertising продуцирала трета реклама, наречена “Buzz”, во која дизајнот на новиот Prius станува вирален во дигиталниот свет откако ќе биде забележан од минувачите во физичкиот свет.
https://youtu.be/bKmOOpigrZo
Останатите две реклами се создадени од InterTrend Communications, а наречени “Reborn” и “Exhilarating”. Во првиот спот, автомобилот станува муза на некој уметник, додека во вториот спот – претставува извор за инспирација на некој диџеј.
Покрај спотовите кои ќе се емитуваат на телевизија, интернет и во кино-сали, кампањата исто така ќе вклучува билборди во физичкиот свет и разни други содржини во дигиталниот свет.
