Најпрестижната меѓународна ознака за квалитет на дизајнот, освен за амбалажата на Podravka, пристигна и за маслиново масло од истарската OPG Turinela, а притоа двата дизајни се создадени од агенцијата Bruketa&Žinić&Grey
Хрватската агенција Bruketa&Žinić&Grey освои две награди Red Dot за дизајнот на амбалажата на Vegeta&Spirulina и маслиновото масло Turinela. Се работи за награда која важи за најпрестижна меѓународна ознака за квалитет на дизајнот. Пакувањето на Vegeta & Spirulina беше прогласено за најдобро од најдобрите, освојувајќи ја титулата „Red Dot Best of the Best“ за најдобар дизајн меѓу сите победници на Red Dot кои се истакнаа по својот исклучително висок квалитет.
Vegeta&Spirulina е производ кој компанијата Podravka го лансираше по повод 75-годишнината од своето основање. Станува збор за ограничено издание на популарниот зачин со алгата која поради исклучително добрите својства ја нарекуваат и суперхрана. Дизајнот е инспириран од фактот што производот беше лансиран на пазарот пред Божиќ и бил наменет како подарок за оние кои очекуваат нешто повеќе од храната. Користени се само материјали кои може да се рециклираат, без лепак. Лименките може повторно да се користат за други намени, како и хартиената обвивка, која поради печатената содржина може да се додаде во домашната колекција на рецепти. Награденото ограничено издание беше инспирација за редовното пакување лансирано летово, кое ги следи принципите на одржливоста и рециклирањето.
„Оваа награда е потврда за нашата страст за создавање иновативни производи кои ги освојуваат срцата на потрошувачите ширум светот. Иако наградената амбалажа е создадена по повод годишнината, таа не само што ја отсликува нашата богата историја и традиција, туку дава искуство што привлекува нови генерации“ – изјави Крунослав Бешвир, генерален директор за деловни програми во Podravka.
„Сакавме да направиме амбалажа која ќе биде добра за нашите партнери, за Podravka и за, сѐ уште, единственото место во универзумот каде што можеме да постоиме“ – истакнува Давор Брукета, генерален креативен директор на агенцијата Bruketa&Žinić&Grey.
Исто така наградениот дизајн на етикетата за екстра девственото маслиново масло Turinela беше изведен од името на брендот и топонимот Мали Турини во Истра, каде што се наоѓа маслиновиот насад. Дизајнерите во името на Туринела замислиле женска фигура, а инспирацијата ја нашле во една локална легенда. Таа вели дека самовилите го граделе амфитеатарот во Пула ноќе со својот магичен танц, пренесувајќи го каменот од Учка до Пула, а дење се криеле во маслиновите дрвја, можеби дури и во Мали Турини, кои им биле на пат. Така, Туринела стана една од самовилите од легендата, а секој клиент може да го повика нејзиниот танц и да ја доживее нејзината магија преку скенирање на QR кодот на етикетата на ова маслиново масло, со помош на мобилен телефон и AR технологија.
„Во нашето масло ја вткаивме нашата љубов кон маслиновото дрво и традицијата на одгледување маслинки во Истра, што оваа ознака на некој начин го нагласува. Наградата Red Dot е потврда дека маслото носи не само докажан квалитет на вкус, туку и задоволство за окото и вистинска магија во секое шише“ – изјави сопственичката на OPG, Аурора Воларевиќ.
„Нашата цел беше, покрај дизајнерски минималистичката и автентична етикета, дополнително да ја прошириме и оплемениме приказната за брендот масло кој претставува магичен резултат на напорите на неговите креатори и семејното заедништво. Водени од оваа цел, и со помош на AR технологијата, создадовме етикета што ја оживува приказната за брендот. Со ова сопствениците на OPG добија дополнителна комуникациска вредност за нивните масла, а на клиентите им овозможија уште една посебност во целокупното искуство“ – објаснува Андреа Кнапиќ, уметничка директорка во агенцијата Bruketa&Žinić&Grey.
Наградите Red Dot се доделуваат веќе 67 години и се сметаат за најпрестижната меѓународна ознака за квалитет на дизајнот. Агенцијата Bruketa&Žinić&Grey досега има освоено 28 Red Dot награди, од кои три се Best of the Best, што претставува најмногу во регионот.
