Истражувањето на 700 маркетери на 9 пазари покажува обновено чувство на самодоверба што произлегува од ерата на промени, криза и конфликти. Дури 85% од испитаниците се согласиле дека креативноста е катализатор за досегање до публиката и поттикнување на економскиот раст.
Глобалниот CMO извештај на маркетинг агенцијата Dentsu Creative за 2023 година, насловен „Creativity at a Crossroads“ („Креативноста на крстопат“), го открива оптимизмот на денешните носителите на маркетиншки одлуки соочени со промените и предизвиците. Користејќи ги податоците од истражувањето на 700 маркетинг директори и маркетинг лидери во САД, Обединетото Кралство, Австралија, Бразил, Канада, Кина, Индија, Италија и Шпанија, извештајот идентификува осум клучни теми кои покажуваат дека и покрај тоа што индустријата е на крстопат, таа е зајакната на полето на креативноста и технологијата.
„Креативноста на крстопат нурнува длабоко во срцата и умовите на денешните маркетери. Од прифаќањето дека вештачката интелигенција е „(не)пријател пред портите“, до цврстото верување дека огласувањето може да биде сила за добро, овој извештај покажува дека маркетинг директорите остануваат оптимисти за иднината и посветени на трансформативната моќ на креативноста, при што 85% веруваат дека таа креативност е катализатор за економски раст, кој се искачува на 94% во САД“ – вели Џули Скелзо, генерална креативна директорка за глобални клиенти во Dentsu Creative.
Среде предизвиците на современиот свет, како што се климатските промени, инфлацијата и геополитичката нестабилност, маркетинг директорите се фокусираат на работите што можат да ги контролираат. Нивната примарна грижа во 2023 година и додека гледаат напред кон 2030 година е поседување и поврзување со публиката во свет каде што често се чини дека трети страни ги држат картите.
Патриша Мекдоналд, генерална стратегиска директорка на Dentsu Creative и главна авторка на извештајот, забележува: „За да поседуваме публика, треба да се поврземе во просторите и местата што им се најважни. Предизвикот е што публиката се менува: тие имаат нови очекувања, нови однесувања и нови вредности обликувани од длабоко поврзан свет. Нивните очекувања пораснаа, додека нивното внимание е поларизирано – тие можат да се нурнат подлабоко од кога било во работите што ги сакаат и да ги игнорираат работите што не ги сакаат полесно од кога било. Затоа, брендовите мора да се градат на нови начини преку искуства, преку култура и преку акција. Изборот е едноставен: ангажирајте се или бидете игнорирани“.
Чеук Чијанг, извршен директор на Dentsu Creative APAC, додава: „Креативноста е важна. Таа е моќен економски мултипликатор кој, кога е добро изведен, нуди конкурентна предност што им овозможува на брендовите подобро да се поврзат со публиката во пазар со повеќекратни избори и повеќе точки за поврзување. Ние веруваме дека одличните идеи можат да живеат насекаде, а моќта на хоризонталната креативност и моделот на Dentsu Creative, кои работат рака под рака со медиумите и платформите за лојалност, можат да обезбедат беспрекорни решенија за поврзување кои стануваат клучни за раст. Оваа студија дополнително го докажува меѓуповрзаниот свет во кој брендовите треба да играат, како и новите и иновативни пристапи што маркетинг директорите препознаваат дека треба да ги прифатат за да напредуваат“.
Напишан во соработка со лидерите низ глобалната мрежа на Dentsu Creative, осумте теми на извештајот им овозможуваат на маркетинг директорите да ги споредат своите области на фокус во однос на нивните колеги – дали нивните инвестиции во технологии и платформи се во чекор со индустријата и дали имаат слични ставови за основите на маркетингот во 2023 година и во иднината.
ОСВОЈУВАЊЕ НА ПУБЛИКАТА
Во ера кога социјалните платформи, трговците и технолошките партнери го одвлекуваат вниманието на публиката од брендовите, а интеракциите меѓу потрошувачите и брендовите бараат сѐ поголем напор и софистицираност, најголемата грижа на маркетинг директорите сега и во иднина е поседувањето и поврзувањето со публика која брзо се развива. За 30% од испитаниците, „развојот на односите со клиентите“ бил нивниот фокус за 2023 година и ќе продолжи да биде додека се движиме кон 2030 година. Ангажирањето со променливата публика, реагирањето на променливото однесување на потрошувачите, претставувањето поразновидна публика и разбирањето на новите технологии беа во фокусот на 28% од маркетинг директорите, додека разбирањето на публиката која припаѓа на Генерацијата Z сè уште е предизвик за речиси четвртина од испитаниците.
ПРОШИРЕНАТА РЕАЛНОСТ НА ЧОВЕШТВОТО
Денешните маркетинг директори бараат искуства кои ги поврзуваат технологијата и човештвото – 87% се согласуваат дека денешните брендови се градат преку искуства, а 88% се согласуваат дека од клучна важност е искуството на потрошувачите да одговара на ветувањето на брендот. За да го постигнат ова, тие прифаќаат нови интерфејси од глас до гест, од проширена реалност до вештачка интелигенција, ги замаглуваат линиите помеѓу онлајн и офлајн светот, содржините и производите и овозможуваат идеи кои се уникатни, прекрасни и разоружувачки човечки.
КУЛТУРЕН КАПИТАЛ
Маркетинг директорите се согласуваат дека забавата ќе биде клучна компонента во градењето бренд и настојуваат да ги градат своите брендови во просторите и местата што им се најважни, инвестирајќи во платформи од подкасти до програмски содржини за да ја привлечат публиката што е потешко од кога било да биде прекината во она што го прави. Дури 79% од маркетинг директорите се согласуваат дека живееме „во свет каде што огласувањето е полесно да се игнорира“, а 80% се согласуваат дека технологиите како преносот во живо ги замаглуваат линиите помеѓу содржините и производите како никогаш досега. Исто така, гледаме дека хуморот се враќа со 58% од маркетерите кои сакаат да создадат моменти на радост во сегашните тешки времиња и се согласуваат дека денешното огласување не е доволно забавно во морето полно со храбри и агресивни промотивни пораки.
ОПШТЕСТВЕНАТА ОДГОВОРНОСТ СТАНУВА РЕАЛНА
Начинот на кој маркетерите пристапуваат кон општествената одговорност се менува. Мнозинството, односно 69% од испитаниците се согласиле дека сме толку фокусирани на општествената одговорност што заборавивме како да продаваме. Надминувајќи ги кампањите од типот „purpose washing“, испитаниците сметаат дека општествената одговорност мора да се развие од спореден проект во интегрален елемент на деловната стратегија бидејќи веќе нема разлика помеѓу она што е добро за општеството и она што е добро за бизнисот. Дури 78% од маркетерите веруваат дека во свет каде што економската нестабилност е забрзана и влошена од климатската нестабилност, иновациите и обновувањето на инфраструктурата се итно потребни и само преку моќта на емоциите можеме да влијаеме на тоа и на трајната промена на однесувањето.
СТРАВ ОД ФИНАНСИРАЊЕ
Обележувајќи ја продлабочената свест за одговорноста на индустријата да ги балансира целта и профитот, маркетинг директорите се загрижени за поларизираниот, понекогаш токсичен, медиумски пејзаж што брендовите би можеле да го финансираат со своите инвестиции. Истражувањето покажало дека 62% од маркетинг директорите се загрижени за потенцијалните негативни последици од нивните кампањи и инвестиции врз животната средина и општеството, додека 64% изразиле загриженост дека нивните медиумски инвестиции ненамерно можат да придонесат кон политичката поларизација, поставувајќи прашања за улогата на огласувањето во обликувањето на јавниот дискурс. И покрај ова, маркетерите остануваат убедени дека огласувањето може да биде сила за добро, при што 81% се согласуваат дека брендовите можат да ги користат нивните буџети за зајакнување на независните и разновидни гласови.
ВЕШТАЧКА ИНТЕЛИГЕНЦИЈА: (НЕ)ПРИЈАТЕЛ ПРЕД ПОРТИТЕ
Вештачката интелигенција е причина за претпазлива возбуда и 87% се согласуваат дека ја претставува иднината на огласувањето и маркетингот. Маркетинг директорите ја поздравуваат ефикасноста што ја овозможува вештачката интелигенција и со задоволство експериментираат, но се сомневаат дали содржината генерирана од вештачката интелигенција воопшто некогаш ќе може навистина да ги придвижи нивните потрошувачи, додека 81% од испитаниците се согласуваат дека клиентите ќе бидат подготвени да платат повисока цена за содржина создадена од луѓе. И покрај тоа што повеќе од половина од испитаниците се прашуваат дали генеративната вештачка интелигенција би можела да ги преземе нивните работни места во иднина, 75% веруваат дека генеративната вештачка интелигенција никогаш нема целосно да ја замени суштината на човечката креативност.
ПОВРЗАНИ ЛУЃЕ
Маркетинг директорите сега бараат флексибилност и разновидност од луѓето со кои работат. Дури 86% сакаат нивните агенции и партнери да ги поврзат вистинските таленти во вистинско време, каде и да се наоѓаат, во мрежата или надвор од неа. Мнозинството, односно 83% од испитаниците веруваат дека брендовите имаат корист од консолидирање на нивните напори во единствена агенциска холдинг компанија, препознавајќи ја моќта на мрежата во светот управуван од податоци и технологија. Сепак, 85% ја ценат различноста на мислењата што произлегуваат од партнерствата меѓу повеќе агенции, забележувајќи ја флексибилноста и агилноста на локалните партнери. Како таков, совршен тим во денешниот свет кој брзо се менува не постои, а маркетинг директорите ја сакаат леснотијата која доаѓа со една агенција, но со моќта на многуте. Компаниите и брендовите кои можат да ги поврзат вистинските таленти во вистинско време или да донесат уникатни перспективи за да отклучат нови резултати се тие што ќе напредуваат.
УСПЕХ ВО ПОВРЗАН СВЕТ
Одговарајќи на публика со зголемени очекувања за интегритетот на брендовите и корисничкото искуство и зголемената тенденција целосно да се избегнуваат содржините што не успеваат да нѐ ангажираат или забавуваат, маркетинг директорите остануваат посветени на трансформативната моќ на креативноста, при што 85% гледаат на креативноста како катализатор за економски раст. Отклучувањето на креативноста која е потребна за напредок во денешниот поврзан свет цврсто стои на крстопатот помеѓу брендот, искуството и културата, а се појавуваат уникатни можности за брендовите и бизнисите да се поврзат со современите клиенти во просторите и местата што им се најважни.
Целосниот извештај од Dentsu Creative за размислувањата на маркетинг директорите во 2023 година може да се симне на следниот ЛИНК.
