Советодавното тело на организацијата на најпознатиот фестивал на креативнста во светот, Cannes Lions, го објави новиот годишен извештај за „Состојбата на креативноста“. Главниот дел од истражувањето – и најголемата студија од ваков вид – претставува комплет алатки базирани на податоци кои имаат за цел да им овозможат на искусните маркетери брзо да го разберат креативниот пејзаж во светот, со функционални совети за тоа како да се поттикне растот на бизнисот ползувајќи ја токму креативност.
Студијата е насловена „Communication Breakdown On The Road to Recovery“, а Спенсер Фокс од LIONS Advisory посочи: „Ова е уникатен прозорец во глобалниот креативен пејзаж, и она што го гледаме е дека иако чувството е оптимистичко кога е насочено нанадвор, внатре во индустријата се случува судир. Постои оптимизам околу напредокот и инвестициите, но и тензии кои треба да се надминат ако сакаме да го реализираме потенцијалот на креативноста како двигател на растот. Во суштина, има надоразбирање во комуникацијата“.
Во 2023 година, постојаните макроекономски грижи ги задушија амбициите на креативната индустрија и принудија буџетски кратења, но во 2024 година се случува многу попозитивна приказна. Бизнисите известуваат за ветувачки раст и зголемување на маркетинг инвестициите, при што 51% од испитаниците од брендовите и агенциите велат дека очекуваат посилен раст оваа година. Сепак, можноста да се капитализира оваа можност со револуционерни креативни дела може да биде изложена на ризик, при што одговорите откриваат две растечки тензии кои создаваат раздор меѓу клучните чинители во креативноста.
Овогодинешната студија открива дека постојат очигледни несогласувања во тоа како брендовите го доживуваат односот агенција-клиент во споредба со нивните агенциски партнери. Кога беа прашани за партнерството, брендовите изразија попозитивен став кон него, додека креативните партнери претставија сосема поинаква слика. Тоа сугерира дека брендовите се помалку запознати со реалноста на нивната ситуација.
Високото раководство била втората цел на критики. Испитаниците од страна на брендовите изразија тешкотии да ги убедат директорите да ја прифатат креативноста. Ова делумно се припишува на отсуството на креативни луѓе во лидерските тимови, така што местата ги заземаат потрадиционални маркетери кои избегнуваат ризик. И покрај тоа што мнозинството луѓе сакаат да ги поместат границите на нивната креативна работа, конзервативните лидери им предизвикуваат чувсто како да не можат да го сторат тоа.
„Нашите наоди покажуваат дека брендовите кои предвидуваат повисок раст за 2024 година имаат 6 пати поголема веројатност да ѝ дадат приоритет на креативноста, а за 4.6 пати е поголема веројатноста дека ќе имаат поголем буџет за маркетинг во однос на 2023 година и дека ќе вложат повеќе инвестиции во градењето на брендот. Тоа е конзистентентен показател за деловната вредност на креативноста“ – истакнува Фокс.
Нудејќи сеопфатен преглед на трендовите и двигателите кои го обликуваат бизнисот на креативноста, студијата е изработена врз основа на глобално анкетирање на речиси 3000 креативци и маркетери, вклучувајки и разговори еден-на-еден со лидери од целиот спектар на индустрија. Целосниот извештај за „Состојбата на креативност“, изработен од LIONS Advisory, е достапен за бесплатно симнување на следниот ЛИНК.
