Креативната агенција Droga5, дел од групацијата Accenture Song, најави планови за меѓународна експанција и со таа цел го назначи Марк Грин за нов глобален извршен директор.
Соосновачот и досегашен извршен директор на агенцијата The Monkeys и актуелен лидер на Accenture Song во Австралија и Нов Зеланд ќе се пресели во Њујорк за да ја преземе улогата на глобален извршен директор на Droga5 почнувајќи од октомври 2024 година, наследувајќи ја Сара Томпсон.
Тој ќе соработува заедно со неодамна назначениот глобален генерален креативен директор, Пеле Сјонел, за да ги надгледува сите креативни канцеларии на Droga5 низ светот, вклучувајќи ги оние во Даблин, Лондон, Њујорк, Сао Паоло и Токио.
Како дел од оваа транзиција, агенцијата The Monkeys ќе премине под чадорот Droga5, при што канцелариите на The Monkeys во Окленд, Мелбурн и Сиднеј ќе станат дел од Droga5, почнувајќи од 1 декември 2024 година.
„Мисијата на Droga5 отсекогаш била да испорача креативност вкоренета во стратегија и цел, опседната со човечноста. Создаваме искуства кои длабоко се поврзуваат со луѓето и додаваат вредност на нивните животи. Марк е докажан лидер, кој ги отелотворува овие амбиции и ќе ја издигне Droga5 на следното ниво на извонредност и суштинско влијание“ – истакнува Дејвид Дрога, извршен директор на Accenture Song и основач на Droga5.
„Цврсто верувам дека креативноста може да влијае на бизнисот и луѓето на големи и влијателни начини. Докажавме дека нашата комбинација на креативна моќ и технолошка трансформација е победничка формула на сегашниот пазар. Привилегија е да ја преземам оваа улога во Droga5 за да ја насочам во нејзиното следно поглавје, а јас сум особено воодушевен што неверојатно талентираниот тим во The Monkeys ќе дојде со мене на ова патешествие“ – посочува новиот глобален извршен директор на Droga5, Марк Грин.
