Сервисот за достава на храна Uber Eats објави нова хумористична реклама за австралискиот пазар во која главна ѕвезда е легендарната американска поп-дива Шер.
Нарачувајќи временска машина преку апликацијата на Uber Eats, Шер сака да се врати назад во гламурозните 80-ти години. Меѓутоа, машината грешно ја разбира нејзината инструкција, па ја враќа многу порано – во 1680-те години. Познатата пејачка е веднаш прогласена за вештерка и спалена на клада, а нејзините светликави чизми ги присвоил некој од разјарената публика.
Спотот наеднаш нè враќа во сегашноста, каде Шер готви во нејзината кујна, со пораката дека Uber Eats не може да достави патување низ времето (анг. Time), но може да достави мајчина душица (анг. Thyme).
„Постојано ми приоѓаат да правам реклами – но креативноста и забавноста што ги претстави Uber Eats ме привлекоа веднаш. Навистина сум горда на финалниот производ. Искрено се надевам дека Uber ќе ми ги врати моите чизми“ – коментира Шер по повод снимањето на рекламата.
Кампањата е создадена во соработка со креативната агенција Special Sydney.
