Британската адвертајзинг групација WPP соопшти ново стратешко партнерство и инвестиции во компанијата Stability AI, пионер во генеративната вештачка интелигенција и развивач на генераторот за слики Stable Diffusion.
Партнерството дополнително ќе ги унапреди способностите на WPP да им испорачува врвни содржини генерирани со помош на вештачка интелигенција на своите клиенти преку различни канали за забава, како што се платформи за стриминг, интерактивни искуства и имерсивни форми на раскажување приказни. На тој начин WPP ја зацврстува својата посветеност да остане во првите редови на технолошкиот напредок во креативните индустрии.
Побарувачката за висококвалитетна продукција во светот продолжува да расте, поттикната од зголемените очекувања на потрошувачите за визуелни содржини и зголемената потреба за диференцијација на брендовите. Ова партнерство дополнително ги опремува двете компании со алатки и увиди за да се задоволат овие барања на пазарот.
„Возбудени сме што ќе соработуваме со Stability AI и ќе ја искористиме нивната револуционерна генеративна технологија за вештачка интелигенција за да поттикнеме иновации во маркетингот и огласувањето. Оваа соработка е единствена по својот фокус на индустријата за визуелни медиуми, а ние сме инспирирани од визијата на тимот на Stability AI за улогата на генеративната вештачка интелигенција во забавата и како таа може да го прошири креативниот процес“ – посочува Стефан Преториус, генерален директор за технологија во WPP.
Како дел од соработката, WPP и Stability AI ќе работат и на зближување на нивните таленти, зајакнување на внатрешната продукција и студиските капацитети и способности на WPP.
