Новата туристичка кампања на грчкиот остров Санторини беше претставена во Музејот на Акропол во Атина како дел од настанот „Санторини 2025: Година на промовирање и поддршка на автентичноста“.
Се работи за модерен, сеопфатен аудиовизуелен наратив кој прикажува една поинаква слика за Санторини – надвор од филтрите на социјалните медиуми. Целта е да се осветли „невидливото лице“ на Санторини – да се прикажат слики, моменти и приказни кои ги надминуваат очекувањата од разгледниците, повикувајќи го светот да го доживеат егејскиот остров на еден автентичен начин.
Новата кампања „Santorini The Authentic“ вклучува централно видео и пет теми: Култура, Вкусови, Искуства, Пејзажи и Вулкански парк. Преку нив, Санторини ќе се обиде да го редефинира својот туристички идентитет, десет години по кампањата „Santorini the One“, одговарајќи на современите потреби на туристите и препознавајќи ја еволуцијата на островот.
„Заборавете на сè што мислите дека знаете за Санторини. Оваа година, време е да се погледне подалеку од познатите глетки и да се открие страната на островот што малкумина можат да ја видат. Скриени села. Автентични вкусови. Локални моменти. Вистински приказни. 2025 година е година на автентичноста – и Санторини ве поканува да го доживеете поинаку. Убавината не се состои само во совршените места за сликање. Туку се наоѓа во секој агол што сè уште не сте го истражиле“ – стои во описот на кампањата.
