Италијанскиот бренд на алкохолни пијалаци Campari објави нова реклама со данскиот актер Мадс Микелсен во главната улога, продолжувајќи ја својата традиција на спојување на класичната коктел-култура со филмската уметност.
Рекламата нуди свежа интерпретација на иконичниот „Негрони“ – коктел длабоко поврзан со идентитетот на брендот, и го прикажува шармот на Микелсен во стилско, визуелно богато опкружување. Данскиот актер се јавува во улога на шанкер кој целосно се соживува со подготовката на коктелот и целиот процес го претвора во вистински ритуал.
Визуелно, рекламата е луксузна и филмска, со топли тонови и прецизно темпо што ги одразува стилот и префинетоста на брендот Campari. Сите детали – од звукот на мразот до црвениот сјај на пијалакот – се нагласени со внимателен дизајн, претворајќи ја подготовката на коктелот во уметнички израз.
Но, на крајот, рекламата добива хумористичен пресврт, така што барменот Микелсен целосно го заборава клиентот што го нарачал коктелот, одлучувајќи таквото „уметничко дело“ да го задржи за себе.
Рекламата премиерно беше прикажана по повод 78-то издание на Канскиот филмски фестивал, чиј официјален партнер е токму Campari. Брендот организираше луксузен настан за филмските ѕвезди, искористувајќи ја можноста повторно да ја истакне својата врска со светот на кинематографијата и раскажувањето приказни.
Режисер на рекламата е Мартин Вернер, а продукцијата е на компанијата &Friends, во соработка со креативната агенција AKQA.
