Меѓународниот фестивал на креативност Cannes Lions 2025 ги објави добитниците на наградите во категориите Health & Wellness, Outdoor, Pharma, Print & Publishing и Audio & Radio Lions.
„Секогаш е возбудлив момент кога ќе ги видиме резултатите од напорната работа на нашите жирија во поставувањето на глобалниот креативен стандард. Сведочиме за дела кои не само што ги поместуваат границите на креативноста, туку и покажуваат реално влијание на креативноста врз бизнисот и општеството. Голема благодарност до сите членови на жирито за нивната посветеност, време и експертиза во селектирањето на идеи кои вистински ја движат индустријата напред“ – изјави Сајмон Кук, извршен директор на LIONS.
Во категоријата Pharma Lions, која ја слави креативната комуникација за фармацевтски клиенти и услуги кои ги комбинираат науката и иновациите, од вкупно 305 пријави беа доделени 9 награди: 1 златна, 3 сребрени и 4 бронзени награди. Главната Grand Prix наградата ја доби кампањата „Make Love Last – Bedroom“, за Viatris, од Ogilvy, Шангај. Делото прикажува како Viagra, бренд што поддржува четиричасовна интимност, соработува со познат уметник за да ги истражи интимните приказни на повеќе парови.
Во Health & Wellness Lions, кои ја наградуваат креативноста за лична благосостојба, од 1169 пријави беа доделени 33 награди: 6 златни, 11 сребрени и 15 бронзени. Главната Grand Prix награда ја доби кампањата „Vaseline Verified“ за Unilever, од Ogilvy, Сингапур, во која научниците на Vaseline ги тестираа најпопуларните трикови од социјалните мрежи во лабораторија. Кампањата научно ги потврди (или демантира) резултатите и ги сподели наодите директно со креаторите на содржини.
Нагрдата „Lions Health and United Nations Grand Prix for Good“ ја освои проектот „The Best Place In The World To Have Herpes“, за New Zealand Herpes Foundation, од FINCH, Сиднеј / Motion Sickness, Окленд / Herpes Foundation, Окленд. Кампањата, со својот прв во светот „Курс за дестигматизација на херпес“ – како глобален систем за рангирање базиран на реални податоци и доза на хумор, на уникатен начин се справува со стигмата поврзана со херпесот – претставувајќи ја како клуч за враќање на националната гордост на Нов Зеланд.
Во категоријата Audio & Radio Lions, кои ја слават креативноста поврзана со звукот, беа поднесени 714 апликации, од кои 21 беа наградени со 3 златни, 8 сребрени и 9 бронзени награди. Главнаѕа Grand Prix награда ја освои „One Second Ads“, за Budweiser, од Africa Creative DDB, Сао Паоло. Со цел да се поврзе уште подлабоко со љубителите на музиката, пивскиот бренд Budweiser создаде серија реклами долги само 1 секунда – со првите ноти од најпознатите песни во светот. Публиката беше предизвикана да ги погоди песните на социјалните мрежи.
Во Print & Publishing Lions, кои ја вреднуваат креативноста во печатените медиуми, од 769 пријави беа доделени 23 награди: 4 златни, 8 сребрени и 10 бронзени. Главната Grand Prix награда ја освои „Price Packs“, за PENNY, од Serviceplan, Минхен – кампања во која PENNY лансираше храбро и ценовно-фокусирано пакување, користејќи ја својата репутација за достапност и насочувајќи го целиот дизајн токму кон цената.
Од вкупно 2001 пријавени проекти во Outdoor Lions, беа доделени 57 награди: 9 златни, 19 сребрени и 27 бронзени. Оваа година беа доделени две Grand Prix награди. Првата ја доби KitKat за кампањата „Phone Break – ‘Crowd’, ‘Public Transport’, ‘Street’“, од VML, Прага – што воедно ја означува првата Grand Prix награда за агенција од Чешка. Кампањата ги реинтерпретираше секојдневните сцени на луѓе преокупирани со своите телефони, така што ги замени уредите со чоколатцата на KitKat, повикувајќи на славната фраза „Have a break, have a KitKat“.
Втората Grand Prix награда отиде кај „Olympic Games Opening Ceremony Paris 2024“, за Paris 2024, од Paname 24, AUDITOIRE, Double 2, OBO, Havas Paris и Havas Events Paris. Креативната визија ја реосмисли Олимписката церемонија така што ја премести надвор од стадионот и ја постави реката Сена како 6-километарска сцена, создавајќи имерсивно искуство кое ги отелотворува основните вредности на Франција – „Слобода, Еднаквост, Братство“.
Специјални награди:
Healthcare Network of the Year
- FCB Health
- Real Chemistry
- Ogilvy Health
Healthcare Agency of the Year
- AREA 23, An IPG Health Company, Њујорк, САД
- 21Grams
- Ogilvy Health
Сите финалисти и победници на Cannes Lions 2025 ќе бидат достапни на платформата The Work. Повеќе информации за Cannes Lions можете да најдете на canneslions.com.
