Компанијата „Алкалоид“ АД Скопје е добитник на бронзен медал од EcoVadis, глобално призната платформа за оцена на одржливоста. Ова признание претставува крупен исчекор во однос на 2024 година, кога „Алкалоид“ го доби статусот „Committed“, што означуваше основно ниво на посветеност на принципите ESG (Environmental, Social, Governance), според критериумите за проверка на EcoVadis.
Со оваа нова оцена „Алкалоид“ се позиционира значително над просекот на компаниите од Македонија присутни на платформата, од кои повеќето се на почетното ниво или во процес на развивање целосни ESG-стратегии. Доделениот бронзен медал ја поставува компанијата меѓу водечките субјекти во земјава во однос на транспарентноста, системскиот пристап и имплементацијата на одржливите практики во секојдневното работење.
Оценувањето од EcoVadis опфаќа четири клучни области: животна средина, трудови и човекови права, етичко деловно однесување и одржливи набавки, а врз основа на сеопфатната проценка на политиките, активностите и резултатите во овие области во компаниите.
Овој резултат е потврда за вложените напори и за стратешкиот пристап на „Алкалоид“ во развивањето практики кои се во согласност со глобалните стандарди за одржливост, како и за севкупното општествено одговорно дејствување во заедницата. Ова признание не само што ја позиционира компанијата како лидер на домашниот пазар туку и ја зацврстува довербата на нејзините меѓународни партнери и соработници.
Со доделениот бронзен медал „Алкалоид“ влегува во топ 35 % од сите компании на глобално ниво, евалуирани од платформата EcoVadis, која до денес има извршено повеќе од 130.000 проценки низ светот, вклучително и во неколку македонски компании.
„Алкалоид“ како компанија која се грижи за подобра иднина и за одржлив развој ќе продолжи со инвестициите и со активностите што ги зајакнуваат принципите на одговорност, етика и одржливост – вредности што се клучни за современото корпоративно работење.
