Видео-платформата YouTube официјално ја претстави својата нова функција „Hype“ во 39 земји, меѓу кои САД, Велика Британија, Индија, Јапонија и Кореја. Алатката е наменета за креатори на содржини кои имаат помеѓу 500 и 500.000 претплатници, со цел да им овозможи поголема видливост и посилна врска со нивните фанови.
Копчето „Hype“ се појавува под иконата за „Like“ на видеата на овие канали, овозможувајќи им на гледачите да дадат дополнителна поддршка. Секој корисник може да „хајпува“ најмногу три видеа неделно. Овие „хајпови“ придонесуваат за подобро рангирање во делот „Explore“, каде се истакнуваат најпопуларните видеа во секоја земја. На овој начин помалите канали добиваат бонус што им помага полесно да се искачат на листата.
Креаторите кои ќе се најдат високо на ранг-листата добиваат ознака „hyped“, додека гледачите што редовно учествуваат добиваат месечна значка „Hype Star“ како признание. За да следат како се развива нивниот успех, YouTube додаде нови алатки во апликацијата YouTube Studio, меѓу кои неделни извештаи и известувања кога едно видео е блиску до влез во ранг-листата.
Функцијата веќе даде добри резултати при тестирањето на пазарите во Турција, Тајван и Бразил. Според YouTube, биле дадени повеќе од пет милиони „хајпови“ на 50.000 канали, при што најголем дел од активноста доаѓала од гледачи на возраст од 18 до 24 години. Компанијата вели дека ова е доказ дека фановите сакаат поактивни начини да ги поддржат омилените креатори на содржини, надвор од класичното „лајкување“ или претплатување.
Во иднина, YouTube планира да ја прошири функцијата со категории како гејминг, мода и едукација. Исто така, компанијата веќе тестирала платени „хајпови“ во одредени земји, што може да значи дека оваа алатка ќе се претвори и во нов извор на приходи за креаторите на содржини.
