Google ја избегна најтешката санкција во антимонополската постапка против компанијата, откако федералниот суд во Вашингтон одлучи дека технолошкиот гигант нема да мора да го продаде својот пребарувач Chrome ниту оперативниот систем Android. Судот го отфрли барањето на американското Министерство за правда, оценувајќи дека тоа е „претерано“.
Сепак, пресудата не е целосна победа за Google. На компанијата ѝ се забранува да склучува ексклузивни договори со кои нејзините апликации автоматски би станале предодредени на некои уреди. Дополнително, Google ќе мора да споделува делови од својата база на податоци за пребарување и кориснички интеракции со квалификувани конкуренти – чекор за кој судот смета дека ќе ја зајакне конкуренцијата.
Берзата веднаш реагираше на веста: акциите на Alphabet, матичната компанија на Google, пораснаа за 7,6% во тргувањето по завршувањето на работниот ден, што покажува олеснување кај инвеститорите што компанијата ја избегна можната поделба.
Тужбата беше поднесена во јануари 2023 година од страна на Министерството за правда и група сојузни држави на САД. Во неа се тврдеше дека Google со години ја злоупотребувал својата доминација на пазарот на дигитално огласување, преку аквизиција на конкуренти, ограничување на изборот за огласувачи и издавачи и оневозможување на развој на конкурентни технологии.
Иако судот не ја прифати идејата за принудна поделба на компанијата, новите правила претставуваат значителен удар врз моќта на Google. Со ограничувањето на ексклузивните договори и задолжителното споделување на податоци, регулаторите се надеваат дека ќе создадат поправедни услови за конкуренција во дигиталниот пазар.
