Минатата недела со работа започна новиот македонски агрегатор на вести „Скрол.мк“, чија цел е да им понуди на корисниците сеопфатен преглед на најважните информации на едно место.
Изворите од кои платформата ги влече содржините се поделени во неколку категории: дневно-информативни портали, телевизии, специјализирани и економски портали, забавни, спортски, како и портали за автомобилизам.
Самиот агрегатор, пак, ги организира вестите во рубрики како: Македонија, Балкан, Свет, Економија, Хроника, Култура, Спорт, Магазин, Сцена и Технологија, со што им овозможува на читателите брза навигација низ различни области од интерес.
Дополнително, „Скрол.мк“ агрегира и видео емисии од Јутјуб, како и најпопуларните твитови од македонската твитер сцена, при што твитовите се прикажуваат според тоа дали се објавени во последните 4, 6 или 24 часа.
Со ваквиот концепт, платформата претставува дигитална алатка која им овозможува на корисниците да останат информирани за сè што е актуелно, во реално време и од најразлични извори.
