Организаторите на Eurobest Awards, наградите што ја слават најиновативната креативност во Европа, денес ја објавија листата на финалисти за 2025 година. Претходно овој месец, жирито се состана во Лондон за да ги разгледа и оцени најдобрите европски креативни проекти и нивната ефективност.
Во овогодишниот натпревар учествувале проекти од 37 европски пазари, а учество во финалето обезбедија проекти од 25 различни земји. Босна и Херцеговина испиша историја на овогодишниот Eurobest, каде кампањата „Време е да застанеме!“ на агенцијата Via Media за клиентот Bingo доби дури четири места во финалето, во категориите „The Award for Change“, „Creative Strategy“ и „PR Eurobest Awards“.
Исто така, независните агенции ја зацврстија својата позиција, освојувајќи поголем број места во финалето, што го нагласува нивното динамично креативно влијание на европскиот пазар. Одразувајќи го растечкиот фокус на специјализираната креативност, наградата „Creative B2B Award“, која се доделува втора година, забележа значителен пораст на учеството.
Сајмон Кук, генерален извршен директор на LIONS, коментираше: „Овогодишните финалисти на Eurobest ја илустрираат европската креативност во момент на трансформација. Од историското достигнување за Босна и Херцеговина до препознавањето на независните агенции, делата одразуваат како креативноста се развива за да создаде вистинско влијание ширум регионот. Со нетрпение ја очекуваме прославата на победниците кои ќе постават стандарди за креативна извонредност во Европа на доделувањето на Eurobest Awards.“
Маријана Бренели, глобална директорка за награди при LIONS, додаде: „Овогодишните финалисти ја слават богатата разновидност и длабочина на идеи кои го обликуваат европскиот креативен пејзаж, со претставен широк спектар на пазари што го покажува културното богатство на регионот. Овие номинации навистина го отсликуваат прогресивниот дух што ја движи креативноста во регионот. Им честитаме на сите финалисти и им благодариме на членовите на жирито за овој исклучителен избор на дела.“
Победниците за 2025 година, вклучително и победниците на натпреварот за млади креативци (Young Creative Competition), ќе бидат објавени за време на наградната церемонија на Eurobest во четврток, 4 декември, со почеток во 15:00 по централноевропско време. Покрај прославата на победниците, доделувањето ќе понуди и увид зад сцената во работата на жирито. Церемонијата ќе може да се следи преку платформата The Work.
Сите финалисти се достапни за разгледување на платформата The Work.
