После заеднички консултации на британскиот Комитет за огласувачки практики (CAP) и Радиодифузниот комитет за огласувачки практики (BCAP), донесена е одлука за забрана на рекламите кои промовираат козметички интервенации, а се насочени кон лица под 18 години.
Како главна причини се наведува негативното влијание кое ваквите реклами го имаат врз замислената телесна слика и менталното здравје на малолетниците, истовремено земајќи ги во предвид и ризиците и потенцијалните компликации од козметичките процедури.
Во одлуката, козметичките интервенции се дефинирани како секоја процедура или третман кои се извршуваат со примарна цел да променат аспект на нечиј физички изглед. Забраната не вклучува козметички производи како кремови, маски за лице, шминка или производи за добивање тен на кожата.
Според новите правила, рекламите кои промовираат козметички интервенции нема да смеат да се емитуваат на телевизија или радио околу програми кои се насочени кон малолетниците. Забраната исто така ги вклучува и не-радиодифузните медиуми кои ја таргетираат конкретната демографска група или пак друга група во која малолетниците сочинуваат најмалку 25% од вкупната публика.
„Поради вродените ризици од процедурите за козметичка интервенција и потенцијалната привлечност на овие услуги за младите луѓе кои имаат проблеми со довербата во телото, важно е да ја поставиме границата високо во однос на маркетингот“ – посочи Шахријар Купал, директор на Комитетот за огласувачки практики на Британија.
