Во текот на вчерашниот ден, Предраг Стојковски објави една одлична колумна која ни отвори една тема за која реално многу малку се пишува кај нас: Дали инфлуенсерите воопшто ќе “преживеат” како “канал” вакви какви што ги знаеме?
Ова прашање го поставуваме во контекст на ерата на филтри, фотошоп и бесконечна трка за лајкови, кога можеби најголемата закана за македонските инфлуенсери не доаѓа од конкуренцијата – туку од нешто што воопшто не е ни човек.
Сведоци сме дека сè повеќе светски брендови веќе ги заменуваат реалните инфлуенсери со дигитални, вештачки креирани личности – совршени ликови дизајнирани со помош на ВИ, зад кои стојат цели тимови на PR и маркетинг експерти. Тие изгледаат идеално, зборуваат совршено, никогаш не задоцнуваат, не бараат хонорари на договор, и – најважното – никогаш не прават скандали кои ќе ги доведат брендовите во незгодна ситуација.
Во светот на Instagram и TikTok, неколку вештачки ликови веќе имаат милионски аудиториум и соработуваат со брендови како Prada, Calvin Klein, Dior и Samsung. Еве неколку примери:
-
Lil Miquela – најпознатата виртуелна инфлуенсерка, со над 2.5 милиони следбеници. Калифорниска „тинејџерка“ која се занимава со музика, мода и активизам.
-
Shudu – првиот дигитален супермодел во светот, креиран од фотографот Камерон-Џејмс Вилсон. Соработувала со Fenty Beauty.
-
Imma – јапонска дигитална инфлуенсерка со уникатен стил и интересен минималистички пристап. Дел од кампањи во Јапонија и пошироко.
-
Kyra – првата индиска виртуелна инфлуенсерка, која комбинира традиционален индиски стил со модерен дигитален израз.
-
Noonoouri – анимиран лик што ги освои модните кругови и има соработки со Versace, Balenciaga и многу други луксузни брендови.
Е сега, зошто брендовите почнуваат да ги сакаат?
Од перспектива на еден маркетинг менаџер, причините се логични:
Тие се секогаш достапни и хиперактивни: ВИ инфлуенсерите можат да објавуваат содржина секој ден, во било кое време и на било кој јазик.
Врз нив имаат потполна контрола: Брендовите сами ја диктираат пораката, изгледот, тонот, па дури и „личноста“ на инфлуенсерот. Нема непланирани изјави, кавги или јавни гафови.
Реално, поевтини се на долг рок: Наместо месечни хонорари, авионски билети и скапи подароци, доволна е инвестиција во добар тим и технологија.
Веќе имаат милионски досег: На TikTok, Instagram и YouTube, неколку од овие дигитални профили веќе имаат милиони следбеници, ангажмани и – иронично – фан-клубови на реални луѓе кои се идентификуваат со нив :)
Што значи овој светски тренд за македонската “инфлуенс сцена”?
Македонските инфлуенсери веќе се соочуваат со неколку предизвици: заситеност на пазарот, пад на досегот, недостаток на автентичност, а сега, се надвиснува – и технолошка закана. Во момент кога брендовите ќе почнат да експериментираат со вакви „совршени инфлуенсери“, голем дел од реалните профили ќе мора да се прашаат: што е тоа што јас го нудам, а што една машина не може?
Веројатно ќе останат само оние кои се навистина влијателни, автентични и способни да понудат емпатија, хумор, искуство и човечка перспектива – нешто што (барем засега) вештачката интелигенција не го реплицира целосно. Нивната “влијателност” ќе мора да биде “ефектуирана” офлајн, да се појавуваат на настани, меѓу луѓето…директно да разговараат со нив за темите по кои се препознатливи и реално да бидат во ситуација да ја искористат својата мрежа за некакво “добро” или акција.
За крај, да го одговориме и прашањето од насловот: Ќе исчезнат ли?
Веројатно не. Или проширен (попрецизен) одговор: Веројатно не сите.
Но, оние кои својата инфлуенсерска кариера ја градеа само на изглед, естетика и copy-paste содржини, наскоро ќе се соочат со конкуренција која не спие, не се жали и не бара хонорар.
А прашањето кое следно се отвара е –> дали брендови во Македонија ќе бидат доволно храбри (или практични) за да ги заменат луѓето со алгоритми?
