Нецела недела по официјалното спојување на Omnicom со Interpublic Group, индустријата конечно доби прв поглед врз тоа каков облик ќе добие „најголемата маркетинг групација во светот“ која ќе продолжи под брендот Omnicom (OMC).
Од перспектива на огласувањето, долгоочекуваниот одговор на прашањето кои агенциски брендови ќе опстанат е конечно тука. Па така, сега знаеме дека BBDO, McCann и TBWA ќе бидат водечките брендови под чадорот на Omnicom Advertising Group (OAG), предводена од извршниот директор Трој Руханен. Покрај овие глобални мрежи, ќе постои и група агенции под ознаката US Advertising Collective за пазарот на Соединетите Американски Држави.
Како што објави Financial Times, тоа значи дека иконични брендови како DDB, FCB и MullenLowe заминуваат во историјата. Клиентите и персоналот на овие агенции ќе бидат интегрирани во оние кои опстануваат, во зависност од пазарните услови. Имено, според најавите, DDB и MullenLowe ќе бидат интегрирани во TBWA, додека пак FCB (со долга историја од 1873 година) ќе биде апсорбирана во BBDO.
Како резултат на овој процес на оптимизација ќе бидат скратени 4.000 работни места. Финансиските придобивки од преструктуирањето би надминале 750 милиони долари годишни заштеди на трошоци, согласно првичните проекции презентирани пред инвеститорите.
Џон Врен ќе продолжи да ја извршува функцијата извршен директор и претседател на Omnicom, Фил Анџеластро ќе ја извршува функцијата извршен потпретседател и главен финансиски директор, додека пак Филип Краковски и Дерил Сим ќе бидат ко-претседатели и главни оперативни директори на споената групација.
Omnicom во својата нова ера ќе биде структуриран околу клучни „поврзани капацитети“. Со нив ќе раководи следниот лидерски тим:
- Флоријан Адамски, извршен директор на Omnicom Media, вклучувајќи ги агенциите Hearts & Science, Initiative, Mediahub, OMD, PHD и UM, како и Acxiom;
- Крис Фостер, извршен директор на Omnicom Public Relations, вклучувајќи ги FleishmanHillard, Golin, Ketchum, Porter Novelli и Weber Shandwick;
- Серхио Лопез, извршен директор на Omnicom Production, вклучувајќи ги Content Solutions, Production Management & Studios;
- Данкан Пеинтер, извршен директор на Omni & Flywheel Commerce Network, каде Omni – напредната интелигентна платформа – ќе ги поткрепува сите капацитети, а Flywheel ќе го предводи трговскиот сегмент;
- Трој Руханен, извршен директор на Omnicom Advertising, вклучувајќи ги BBDO, McCann, TBWA и U.S. Advertising Collective;
- Мајкл Ларсон, извршен директор на Diversified Agency Services, под чија надлежност се:
- Дана Мејман, извршна директорка на Omnicom Health, која ги опфаќа Healthcare Professional & Consumer, Medical Communications, Patient Engagement & Managed Markets;
- Марк О’Брајан, извршен директор на Omnicom Branding, вклучувајќи ги Interbrand, Siegel+Gale, Sterling Brands и Wolff Olins;
- Лук Тејлор, извршен директор на Omnicom Precision Marketing, вклучувајќи ги Credera, Critical Mass и RAPP.
Над овие столбови ќе стојат лидерите за успех на клиентите на Omnicom, предводени од Џeки Кели, директорка за клиенти и деловни операции, и Андреа Ленон, директорка за искуство на клиенти, како и глобалниот тим за раст на Omnicom, предводен од Џорџ Манас, директор за раст и решенија.
Клучен елемент во новата организациска и развојна стратегија на Omnicom ќе биде Acxiom, специјализираната агенција за управување со податоци на IPG. Имено, Acxiom ќе го поддржува медискиот екосистем на Omnicom и „ќе ги обедини платените, сопствените, стекнатите и трговските канали во беспрекорен систем што создава вредност, прецизност и мерлив раст во свет ориентиран кон приватност“ – според описот на компанијата.
Acxiom ќе биде темелот на новата податочна стратегија на Omnicom, која компанијата ја гледа како своја уникатна предност на пазарот. Нивната датабаза обединува 2,6 милијарди потврдени глобални идентификатори, секој со стотици културни, медиумски и трговски сигнали, давајќи им на брендовите неспоредлив увид во однесувањето на луѓето ширум светот – без потпирање на „колачиња“ од трети страни.
На тој начин Omnicom станува директен конкурент на Publicis Groupe, која годинава ја додаде Lotame кон својата податочна платформа Epsilon, со што тврди дека има пристап до четири милијарди уникатни профили.
Освен податоците и медиумите, другите клучни области за кои Omnicom тврди дека ќе му донесат пазарна предност се: создавање „највлијателна“ содржина; „поврзана трговска извонредност“; и скалирани генеративни AI-капацитети.
