Резултатите од истражувањето покажуваат дека скоро 65 проценти, или можеби дури и повеќе од пребарувањата на Гугл завршуваат без кликнување на резултатите од пребарувањето. Станува збор за т.н. zero-clicks пребарувања, кои се чини, се многу почести отколку што се претпоставува.
Податоците за големиот број пребарувања без кликови ги објави аналитичката компанија SimilarWeb по анализата на пребарувањата на Гугл на повеќе од 100 милиони корисници во периодот од јануари до декември минатата година. Според нивните резултати, околу 65% од пребарувањата не завршиле со ниту еден клик, нешто повеќе од 33% од резултатите од пребарувањето завршиле со кликнување на органските резултати од пребарување, додека 1,59% од пребарувањата завршиле со кликнување на платен резултат од пребарувањето. Интересно, пребарувањата без кликови се многу почести на мобилните уреди – 77,22 проценти, додека тој број кај десктоп компјутерите е многу помал и изнесува 50,75 проценти.
Некои други анализи дури велат дека овие податоци се оптимистички бидејќи не се земени предвид сите податоци за пребарување преку мобилен телефон и гласовно пребарување, а процентот на нула кликања може да биде дури и малку поголем.
Резултатите од ова истражување стигнаа и до Гугл, од каде што не се многу воодушевени и веруваат дека е користена погрешна методологија за начинот на кој корисниците пребаруваат. Тие нагласуваат дека Гугл секојдневно испраќа милијарди кликови до веб-страниците, а покрај самиот сообраќај, корисниците и компаниите се поврзуваат на разни начини со пребарувањето. На пр. кога барате некоја компанија, меѓу резултатите од пребарувањето ќе се појават и телефонскиот број, работното време и адресата на таа компанија. Во такви случаи, корисниците не мора да кликнат на линкот од резултатите од пребарувањето, туку едноставно можат да го повикаат бројот што е прикажан или да одат директно на веб-страницата на продавницата или во самата продавница и на крајот да го купат она што им треба.
Исто така, понекогаш проблемот е во тоа што луѓето не се сигурни кои зборови да ги пребаруваат за да го добијат одговорот за кој се заинтересирани, поради што треба да извршат повеќе пребарувања, а повеќето од нив нема да кликнат какви било резултати од пребарувањето. Компанијата предупредува дека бројни пребарувања ги носат корисниците до апликации наместо до веб-страници, што исто така не е опфатено со оваа методологија за мерење.
