Големиот фестивал на креативноста, маркетингот и комуникациите е место на средба за креативци, стратези, лидери и сите оние што не бараат готови одговори, туку подобри прашања
Новото издание на големиот фестивал на комуникациската индустрија повторно обединува меѓународни имиња кои го обликуваат начинот на кој размислуваме за индустријата, бизнисот и идеите. Од 7 до 10 мај, Денови на комуникациите се враќаат во Ровињ со програма што ја става стратегијата токму таму каде што ѝ е местото – во средиштето на одлучувањето. Токму таквиот поглед на стратегијата, како дисциплина што не служи само за создавање впечаток, туку за пронаоѓање на најдобрата насока за развој, на DK2026 го носи Марк Полард – еден од највлијателните светски стратези на денешницата, автор на книгата „Strategy Is Your Words“ и основач на Sweatheada, еден од највлијателните глобални стратегиски поткасти со повеќе од 1,3 милиони слушања.
Полард е стратег кој, речиси случајно, завршил токму таму каде што треба да биде. Наместо право, избрал хип-хоп, веб и радио, а тој пат го одвел директно во огласувањето – и тоа во можеби неговата најпредизвикувачка дисциплина: стратегијата. Онаа што поттикнува поинакво размислување и не остава простор за површни одговори. Во текот на кариерата работел за некои од највлијателните глобални брендови како Facebook, Twitter, The Economist и Mozilla, раководел со стратегиски тимови во агенции како McCann, Leo Burnett и Big Spaceship, настапувал на сцените на Cannes Lions и TEDx, а бил член и во жиријата на Webbys и 4As Jay Chiat Awards.
ПРЕДАВАЊЕ ШТО НЕ БАРА ПУБЛИКА, ТУКУ УЧЕСНИЦИ
Неговиот пристап кон стратегијата е директен и ослободувачки искрен, поради што совршено се вклопува во типично нетипичните Денови на комуникациите. Во Ровињ доаѓа со предавањето „Strategy On You“, кое е сè, освен вообичаена стратегиска сесија. Полард не нуди класични „keynote“-предавања ниту однапред подготвени рамки, туку ја гради содржината на самото предавање околу публиката што го слуша во тој момент, користејќи ја стратегијата како алатка за размислување, а не како перформанс.
На главната сцена, Марк Полард ќе им се придружи на Јирген Шмидхубер, таткото на модерната вештачка интелигенција, и на Џули Супан, елитна бренд-стратегиња заслужна за позиционирањето на YouTube, Reddit и Dropbox.
Од 7 до 10 мај, Ровињ повторно ќе биде место на средба за регионални и меѓународни лидери од креативната, маркетиншката и комуникациската индустрија. Повеќе информации на www.danikomunikacija.com.
