Технолошкиот гигант Фејсбук го назначи Алекс Шулц, досегашен потпретседател и директор за развој и аналитика, да биде нов генерален маркетинг директор на компанијата.
Шулц доаѓа на местото на Антонио Лусио, кој минатиот месец го најави своето заминување од Фејсбук, со цел комплетно да се посвети на промоцијата на различностите, инклузивноста и еднаквоста како маркетинг консултант.
Новиот маркетинг директор, Алекс Шулц, важи за долгогодишен член на Фејсбук, придружувајќи се на компанијата во 2007 година како аналитичар, за постепено да се издигне во хиерархијата и во 2014 година да биде назначен за потпретседател за развој. Пред Фејсбук, Шулц работел како маркетинг директор на платформата за е-трговија Ebay.
Шулц ги поминал последните четири години на подобрување на безбедносните прашања и корисничките стандарди на Фејсбук. Се претпоставува дека неговото назначување на новата позиција ќе значи поголемо интегрирање на безбедносните аспекти во маркетингот на компанијата, фокусирајќи се на прашања како корисничката приватност и борбата против говорот на омраза на платформата.
