Преку новата масовна иницијатива “Working With Cancer” („Работење со рак“), добротворната фондација на групацијата Publicis ги повикува компаниите ширум светот да се заложат за поддршка на вработените кои имаат рак.
Премногу често вработените се обидуваат да го сокријат фактот дека имаат рак. Тие стравуваат дека споделувањето на нивната дијагноза со работодавецот може да ги чини нивното работно место. Ова му станало многу јасно на извршниот директор на Публицис, Артур Садун, кога добил илјадници вакви сведоштва откако самиот тој соопшти дека му бил дијагностициран и бил лекуван од рак.
За директно да ја предизвикаат стигмата на ракот на работното место, Артур Садун и Фондацијата Публицис ја лансираа иницијативата „Работење со рак“ за време на Светскиот економски форум во Давос. Садун ги покани сите бизниси, од која било големина, да се приклучат на инцијативата преку веб-страницата workingwithcancerpledge.com.
Иницијативата е поддржана од водечки непрофитни организации за поддршка на луѓето со рак, вклучувајќи ги Memorial Sloan Kettering Cancer Center, MacMillan Cancer Research и Gustave Roussy Institute.
Кон иницијативата веќе се приклучиле и преку 30 светски компании, вклучувајќи ги Abbvie, Adobe, AXA, Bank of America, BNP Paribas, BT, Carrefour, Citi, Disney, EE, Google, Haleon, L’Oréal, Lloyd’s , LVMH, Marriott, McDonald’s, Meta, Mondelez, Microsoft, MSD, Nestlé, Orange, Omnicom, Pepsico, Reckitt, Renault Group, Sanofi, Toyota, Unilever, Verizon и Walmart.
Садун понуди особено високи пофалби за нивниот голем конкурент, групацијата Omnicom, за учеството во инцијативата: „Тоа кажува многу за лидерството на [извршниот директор] Џон Врен“ – посочи Садун.
Оние кои ќе се приклучат на иницијативата треба да гарантираат дека на пациентите со рак ќе им обезбедат сигурност на работното место во времетраење од најмалку една година и персонализирана поддршка кога ќе се вратат на работа.
Групацијата Публицис ќе ја поддржи кампањата со медиумски простор во вредност од 100 милиони долари донирани од партнерите. Технолошката компанија Meta исто така донираше 1 милијарда импресии. Акцентот на активностите ќе биде ставен на Светскиот ден на ракот на 4 февруари.
