Француската групација на луксузни брендови Kering го соопшти името на наследникот на Алесандро Микеле на позицијата креативен директор на италијанскиот моден бренд Gucci: 39-годишниот италијански дизајнер Сабато Де Сарно.
Де Сарно ја започнал својата кариера во светот на модата уште во 2005 година, приклучувајќи се на Prada. Тој потоа преминал во Dolce & Gabbana, за во 2009 година да направи нов трансфер, овој пат во Valentino. Благодарение на својот талент и напорна работа, Де Сарно напредувал низ редовите на Valentino, евентуално преземајќи ја функцијата Fashion Director („директор за мода“).
Како нов креативен директор на Gucci, Де Сарно ќе го води дизајнерското студио на модната куќа и ќе биде задолжен за дефинирање на креативната визија на брендот за машки и женски производи, кожни производи, додатоци и предмети за животниот стил.
За својата работа тој ќе биде одговорен директно пред претседателот и генерален извршен директор на Gucci, Марко Бизари.
„Горд сум што се придружувам на куќа со таква извонредна историја и наследство, која со текот на годините се одважи да ги прифати и негува вредностите во кои верувам. Трогнат сум и возбуден што можам да придонесам со мојата креативна визија за брендот“ – истакна Сабато Де Сарно.
Првата колекција на Gucci под креативното водство на Де Сарно ќе биде претставена на женската модна недела во Милано во септември 2023 година.
