Глигор Михаиловски е менаџмент консултант, извршен директор на консултантската куќа СЕГ Холдинг и актуелен претседател на Асоцијацијата за менаџмент консалтинг МКА 2000. Работи со клиенти во повеќе сектори и индустрии повеќе од 13 години, применувајќи вештини и искуство како искусен сертифициран менаџмент консултант. Посебно е успешен во услуги поврзани со мониторинг, евалуација и учење, развој на (социјалните) бизниси, стратешкиот менаџмент, управување со проектен циклус и деловни иновации. Успешно спровел повеќе проекти и обуки за национални и меѓународни организации, јавни и приватни субјекти и граѓански организации, помагајќи им да ги постигнат своите цели, да ги подобрат своите постигнувања и да создадат позитивно социјално влијание. Повеќе за консултантската работа во Македонија и за тоа како да се остане релевантен во пејсаж кој постојатно се менува, прочитајте во интервјуто во продолжение.
Маркетинг365: Можете ли да споделите со нас некои сознанија за актуелните трендови и предизвици што ги забележувате во областа на консултантските услуги, особено за пазарот во Македонија?
Глигор Михаиловски: Пазарот на консултантски, квалитетни, услуги е недоразвиен. Има многу историски причини за тоа, како што е на пример напливот на донаторски средства, преку граѓански и јавен сектор, крајот на 90-тите и почетокот на 2000-тите. Со тоа, се наруши односно меѓу побарувачката и понудата, односно, се воспостави практика на добивање на гратис консултантски услуги. По завршувањето на поддршката, веќе, клиентите (без разлика дали доаѓаат од приватен или граѓански сектор) очекуваат услуги кои некој таму друг ќе ги плати. Секако, ова е само една од причините. Втората причина, по мене, е самиот еко-систем и регулативата. Ние сеуште немаме дефиниција за консултант, дури и во систематизацијата на дејности (најблиску што постои за регистрација на шифра на дејност е советување и раководење, или обуки). Со тоа, е нејасна границата на формата на правното лице кое би испорачало, квалитетна консултантска услуга. Трета причина, повторно ќе кажам, по мене, е недостатокот од соработка со меѓународни консултантски куќи и разбирањето на значењето на човечките ресурси и вложување во нив. Така што, имаме ситуација кога се бројат на прсти консултантски куќи кои имаат над, не 10, 5 целосно вработени лица. Во минатото, имало доволно средства, проекти и фондови, кога главните, сениор консултанти ангажирале ад-хок консултанти, или пак недоволно биле мотивирани истите од нив да работат на кратко рочни или средно рочни проекти. Сега, голем дел од нив, работат како консултант, поединец, и со тоа не може да одговори на сегашните барање на клиентите (финансиски институции, донаторски проекти или организации од приватниот, јавниот и граѓанскиот сектор). Сето ова, резултира со главниот предизвик за нас консултантите, а тоа е нискиот надомест кој ни се исплаќа. Имено, многу мали се корекции на надоместоците (консултантски ден, или еднократен надомест) во споредба со зголемените трошоци за живот во земјата, во последните 10 години. А за да го надминеме, ќе треба да сме лојални едни со други, вмрежени и да инсистираме на соодветен надомест. А пак да стигнеме и до тоа, треба да обезбедиме квалитетна услуга, а за да знаат клиентите дека има основ за квалитетна услуга – треба да се трудиме да обезбедиме стандардна и документирана услуга.
Маркетинг365: Како претседател на здружението на консултанти МКА-2000, какви иницијативи или стратегии спроведувате за поттикнување на раст и професионализам во консултантската индустрија?
Глигор Михаиловски: Јас сум претседател на МКА 2000 од јули минатата година, и на почетокот од мојот мандат работев на консолидирањето на редовите, кога се соочив со пад на редовни членови на организацијата. Сега, слободно можам да кажам, со напорите на Управниот одбор на МКА 2000, успеавме да стигнеме до бројка од 40 члена, со тенденција за значителен пораст на членовите до крајот на годината. Затоа, од април оваа година, повторно ангажиравме Секретар на МКА 2000, кој ќе ја предводи Извршната канцеларија и амбициозните планови на МКА 2000. Голем дел од тие планови се однесуваат на поттикнување на професионализмот во консултантската индустрија. Како што реков погоре, МКА 2000 ја има франшизата за Certified Management Consultant CMC®, кој е присутен во над 70 земји од светот, и постои од 1976 година. Во Македонија има над 15 CMC® менаџмент консултанти а до крајот на годината ќе стигнеме до бројка од над 20. Значи, силно верувам во стандардизација на услугите, кои осигуруваат квалитет за консултантите. Ги поканувам сите консултанти кои сеуште не се членови на МКА 2000, и кои сакаат доминантно да работат како консултанти, да повелат да ни се придружат (токму крај на април 2024 објавуваме нов повик за сертификација со CMC®). Но, фокусот ни е и на меѓусебно учење. Секој месец, имаме вмрежувачки настан, го викаме „Консултант за консултант“ каде споделуваме искуства, идеи и можности за заеднички акции и проекти. Од друга страна, соработуваме со компаниите, на пример преку тесна соработка со CEED Бизнис клубот, но и со јавниот сектор. Токму изминатата година ги понудивме нашите услуги на неколку министерства, пред сé, кои имаат ингеренции од областа на економскиот развој, децентрализацијата и дигитализацијата.
Маркетинг365: Со вашето долгогодишно искуство како консултант, кои мислите дека се клучните квалитети или вештини кои ги разликуваат успешните консултанти од останатите?
Глигор Михаиловски: Во рамките на сертификатот CMC® еден значителен дел се посветува на етичко однесување кон клиентот. Можеби за некој од Македонија тоа ќе биде чудно, но МКА 2000 треба, преку своите членови, да промовира одговорно работење, каде заедно со клиентите треба да внимаваат на влијанието од нивните активности, не само во смисла да предизвикаат хазардни ситуации тука користа да биде повеќекратна. Со еден збор – општествена одговорност. Значи, успешните консултанти, посебно сертифицираните консултанти (тоа значи добиваат на интервали независна и објективна потврда за својата работа) мора да имаат пошироко разбирање на своето делување во заедницата. Тоа е атрибутот кој ги разликува квалитетните консултанти од останатите. Секако, тука се и основите: мора да биде отворени кон клиентот, со општи познавања од повеќе области, мора да размислуваат „надвор“ од кутијата, да даваат предлози и кои претходно клиентот не ги земал во предвид, и мора да бидат постојано тука да ги следат предложените решенија. Исто така, мој став е, дека корпоративниот пристап (односно консултантска куќа) е најдобро решение за обезбедување комплетна услуга за клиентот (менаџмент, техничка, административна). Според тоа, консултантски куќи, или здружени консултанти го зголемуваат степенот на успешноста за разлика од поединци.
Маркетинг365: Како му пристапувате на процесот на развивање приспособени решенија за вашите клиенти и кои методологии или рамки ги сметате за најефикасни во вашата практика?
Глигор Михаиловски: Пред сé, бизнис дијагностиката мора да биде квалитетно изведена. За таа цел, сакаме да користиме нешто што, во другата консултантска куќа Омниум Коучинг и Тренинг, го викаме Холистичен Ко-Коучинг® (Holistic Co-Coaching®), или во превод, седнуваме заедно со клиентот и правиме целосна дијагностика на неговите деловни активности. Но, не само во сегашнота, туку се обидуваме да добиеме информации за она што клиентот го има спроведено, што е она што планира да го спроведе. На тој начин, се запознаваме и со неговите вредности. Вообичаено, тоа го правиме со тим од најмалку 2 члена, со цел секој со својата експертиза да може да направи соодветна дијагностика. Мислам дека овој начин се покажал како најефективен во пристапот кон клиентот и кон обезбедување квалитетна консултантска услуга.
Маркетинг365: Во денешното брзо деловно опкружување, како да останете ажурирани со најновите случувања и иновации во вашата област и како да се погрижите вашите консултантски услуги да останат релевантни и влијателни?
Глигор Михаиловски: Ние постојано ги следиме најновите тенденции во различните сектори, пред се, приватниот сектор. Тој има голема улога врз развојот или стагнирањето на консултантскиот сектор. Но, исто така, како што покажа Ковид кризата, или како што се случува со воените активности во Украина и Русија, приватниот сектор покажа дека може да се прилагоди. Со тоа, и ние. Всушност, ние и најчесто им помагаме на клиентите да се прилагодат кон новонастанатите услови, преку демонстрација на алтернативни пазари или финансиски можности за приватниот сектор. Исто така, им помагаме на јавниот сектор да дефинираат нови стратегии и акциски планови, во поддршка со меѓународните организации. Но, успешните консултанти, или тие што ќе останат да работат, најчесто вложувале многу во човечките ресурси. Во услови на зголемена емиграција од Македонија на човечки ум, треба да се биде многу внимателен како ќе се мотивираат, постојано надградуваат и наградуваат таквите човечки ресурси. Тоа важи и за консултантите и консултантските куќи. Токму ваквите кадри, мотивирани да учат и да бидат успешни, можат да ја обезбедат конкурентската предност пред останатите.
Маркетинг365: Неодамна Вашата консултантска компанија СЕГ Холдинг прослави значаен јубилеj од 10 години постоење. Можете ли да ни споделите некоја незаборавна успешна приказна или проект што може да се сметаат за особено значајна одредница во развојот на компанијата?
Глигор Михаиловски: Ние сме горди на повеќето проекти кои ги спроведовме во овој период. Работејќи со јавниот сектор (централна и локална самоуправа), приватен сектор (микро, мали, средни но и големи компании), граѓански сектор (граѓански иницијативи, здруженија, фондации но и неформални групи), научивме многу за Македонија. Ваквиот пристап чинам и беше клучен во одреден период да ја задржиме стабилноста, што беше и е препознато од голем број донатори, како Европската Унија, УСАИД, УНДП, кои се наши тековни (директни или индиректни) добавувачи. Тоа е резултат исклучиво на флексибилноста на нашиот персонал, но и на нашите соработници експерти, со кои заеднички ги проектираме идните ангажмани. Во нашиот бизнис важна е комуникацијата, и тоа на проектно но и на раководно ниво. Соработката со странските консултантски организации, бизниси е исто така битна за да може да се планира од каде доаѓа следниот ангажман. Но, пред сé, нашиот пристап каде соработката е поблиска од конкуренцијата, е причина за успешни 10 години.
