CRNOBELO.com е успешна македонска приказна која се гради веќе 15 години. Најчитаниот лајфстајл портал во земјата е препознатлив бренд со низа награди и признанија зад себе.
За почетоците во време кога не постоеја социјални мрежи, предизвиците со кои се соочиле низ годините, моменталната состојба на пазарот и идните планови, поразговаравме со основачот и извршен директор на Црнобело Медиа, г-дин Игор Поповски.
1. Оваа година порталот CRNOBELO.com го слави својот 15-ти роденден. Кој беше мотивот за неговото основање и зошто баш се одлучивте за портал посветен на животниот стил и забавата?
Лансирањето на CRNOBELO.com се поклопи со завршувањето на моите студии на департманот по е-бизнис на Економски Факултет во Скопје. Како дел од студиите постоеја предмети и вежби во чии рамки правевме анализи на моменталната ситуација на пазарот.
Заклучоците од тие анализи и проекти беа дека има простор на пазарот да се направи нешто што ќе биде подобро и поуспешно од она што постои во моментот.
Почетокот, морам да бидам искрен, беше мошне наивен, не претпоставувајќи колку ќе биде тешко да се пробие нешто ново, а уште потешко да се стигне и да се одржи каде што сме денес, 15 години подоцна. Тоа беше време кога немаше Фејсбук, немаше Инстаграм, па се користеа „постаромодни“ канали за дистрибуција на содржините со цел луѓето да дознаат за нас.
Живеејќи во средина каде што политиката е секојдневие, а политичарите најголеми ѕвезди во општеството, решивме да направиме нешто поинакво и 15 години успешно функционираме настрана од сите дневнополитички вести и случувања.
Нашите посетители тоа го забележуваат и си створија навика CRNOBELO.com да им биде место за релаксација, место каде што ќе се одморат од политичкото секојдневие и црна хроника.
2. Кои беа некои од највпечатливите моменти кои ги одбележаа изминатите 15 години од основањето на CRNOBELO.com? На што најмногу се гордеете и со радост се присеќавате?
Целиот проект започна како хоби и работењето на порталот го гледав како време поминато во забава и релаксација, а не како работна обврска.
Претпоставувам дека тоа е и причината поради која „издржавме“ цели 3 години без реклами и финансии.
Првите три години сајтот работеше со загуба и сите средства беа покривани од платата од редовната 9-5 работа. Секое отскокнување и преминување на повисоко скалило биле моменти за одбележување и прославување.
Почнувајќи од моментот кога решавам да се посветам „фул тајм“ на CRNOBELO.com, борејќи се финансиски да се врзе крај со крај, до проширување во нашите моментални канцеларии каде што функционира целиот тим.
Кога сме кај тимот кој стои зад CRNOBELO.com, сакам да потенцирам дека тоа е она што ме прави најгорд. Кохезијата, соработката, грижата, одговорноста на сите луѓе кои некогаш биле и оние кои сè уште се во позадината на сајтот.
Без секое помало или поголемо делче од нивниот придонес, немаше да бидеме каде што сме денес и CRNOBELO.com немаше да биде успешен и најчитан портал во Македонија.
3. Кои беа најголемите предизвици со кои се соочивте во последните 15 години и како успеавте да ги надминете?
На почетоците најголеми предизвици беа финансиите, односно борбата да се покријат оперативните трошоци. Кога целите да бидете најпосетен сајт во Македонија, тоа повлекува трошоци за сервери, хостинг, одржување на сервери и слично.
Со самиот раст, колку беше голема радоста, толку растеше и загриженоста, бидејќи секој раст на посетите значеше потреба од поголеми ресурси за хостинг.
За среќа успешно успеавме да ги совладаме овие предизвици преку пронаоѓање партнери кои веруваа во нас и во нашата идеја и ни дадоа безрезервна поддршка која трае и ден денес.
Потоа следеа предизвиците да ги убедиме маркетинг агенциите и компаниите дека сме сериозен портал кој е тука со долгорочна стратегија и план за развој, портал со тим кој е тука да одговори на сите можни предизвици и барања. Секогаш беше тежок првиот чекор за започнување на соработка, но кога еднаш ќе започнеме соработка со клиент, односно ќе бидеме вклучени во кампања, речиси без исклучок клиентот бил задоволен и ја продолжувал соработката.
Токму овие мали чекори ни овозможија бројот на клиенти да се зголемува од ден во ден, од година во година и тоа да ни овозможи континуиран раст секоја следна година.
4. Како ја оценувате состојбата со македонските онлајн медиуми и како го оценувате домашниот развој на дигиталниот маркетинг?
Ме радува фактот што пазарот се развива и со секоја година сè повеќе компании навлегуваат во дигиталниот маркетинг и одлучуваат да се рекламираат на домашните портали.
Ако се земе предвид дека пред 15 години беше потребно да ги убедуваме компаниите зошто е потребно да имаат своја веб страна, денес ситуацијата е значително подобрена.
Сè повеќе компании се решаваат да отворат своја е-продавница, да продаваат онлајн, а овој прогрес особено го забрза Ковид пандемијата. Факт е дека сите овие компании треба некаде да се рекламираат, а најдобро место за промоција и афирмација на брендот се македонските портали. Велат, во време на златна треска, бидете оној што ќе продава лопати.
Ние сме тука како медиум со квалитетна содржина да им овозможиме на бизнисите во Македонија соодветно место за промоција на нивните компании и производи.
Да бидеме реални, темпото на развој на домашниот пазар за дигитален маркетинг не е ни одблизу колку што треба да биде, или колку што е на пазарите во соседството, но важно е што се оди напред и има прогрес.
5. Што го очекува CRNOBELO.com во следните 15 години? Кои се Вашите цели за претстојниот период?
Бариерите за влез во овој бизнис се многу мали. Сајт кој на прв поглед ќе изгледа слично со лидерите на пазарот може да се лансира за една недела.
Во време на популарност на социјалните мрежи и клик-бејт наслови, да направите вирална содржина која ќе ги измами читателите да ја отворат, а вас ќе ви ги „крене“ посетите на краток рок е лесно.
Но, да се одржите на врвот со години, да градите долгогодишна доверба со партнерите, маркетинг агенциите, компаниите и да не потфрлите ниту еднаш, да бидете тука секогаш кога ќе се појави проблем и да се понудите да го решите, е тоа е тешко. Но, тоа е она што нашите партнери, маркетинг агенциите, клиентите го ценат и поради тоа ќе ви ја даваат нивната редовна поддршка и доверба.
Нашите цели се да ја задржиме лидерската позиција на пазарот, да нудиме различни содржини од другите, да иновираме во типот на содржини и да продолжиме да ѝ докажуваме на конкуренцијата дека сè додека нè копираат и ни преземаат содржини, никогаш нема да бидат подобри од нас.
