Маја Велевска Литовска, бренд менаџер во Бимилк, компанија со традиција повеќе од 70 години, е креатор на релации на доверба и лојалност со брендовите кои се дел од нашите животи и нашето секојдневие низ повеќе генерации. Што значи да се верува во еден бренд, како да се развие лојалност со новите генерации потрошувачи, како да се пренесат традиционалните вредности и како да се остане омилен бренд – ова се прашањата на кои Велевска Литовска дава одговор во ова интервју. Заедно со својот тим ја создадоа последната кампања „Секој ден, нов рецепт“, која ја инкорпорира современата маркетиншка комуникација.
Маркетинг365: Што ви беше водечката мисла во создавањето на кампањата „Секој ден, нов рецепт“?
Маја Велевска Литовска: Водечката мисла во создавањето на кампањата „Секој ден, нов рецепт“ беше да им помогнеме на нашите потрошувачи во секојдневните предизвици при подготовка на оброците, особено кога времето за готвење е ограничено, а некогаш едноставно немаме инспирација. Започнавме со одговори на наједноставните прашања – „Што ќе јадеме денес?“ или „Доаѓаат гости, што брзо да приготвам?“. Со кампањата сакавме да понудиме практични и инспиративни решенија, кои се лесни за примена, а истовремено креативни и вкусни. Преку едноставен пристап, како скенирање на QR код на пакувањето на Битолска павлака, ги инспирираме нашите корисници со идеи за рецепти што одговараат на различни прилики – од брзи семејни оброци до впечатливи специјалитети. Дополнително, воведувањето на неделно мени помага за полесна организација на оброците и купување на потребните состојки. На крајот, нашата цел е да ја претвориме подготовката на оброците од секојдневна обврска во пријатно искуство, каде што секој може да биде креативен во кујната и да ужива во времето поминато со најблиските.
Маркетинг365: Кога помисливте дека кулинарска работилница со деца, павлака и тимска работа може да биде „рецепт“ за совршен настан? Што ве инспирираше да го создадете овој комуникациски концепт?
Маја Велевска Литовска: Овој настан беше инспириран од нашата поддршка и долгогодишна посветеност на заедницата, како и нашата желба да создадеме нешто што ќе ги инспирира и мотивира децата. Со оглед на тоа што секоја година го одбележуваме Светскиот ден на детето, сакавме да понудиме нов и креативен начин за оваа прослава. Овој пат, поврзувањето на кулинарската уметност, тимската работа и здравата исхрана беше природен избор.
Децата секогаш се неисцрпен извор на енергија и радост, и нивната љубопитност за нови активности, особено кога се поврзани со забавни и креативни задачи, беше главна инспирација за создавање на овој настан. Работилницата, која се одржа во соработка со СОС детско село, беше не само кулинарска активност, туку и едукативно искуство. Децата имаа можност да учат за здравата исхрана и важноста на млекото и млечните производи, додека соработуваа во тимови и создаваа нови рецепти.
Овој концепт беше осмислен така што на децата им понуди повеќе од само кулинарска активност – тие научија како да работат заедно, како да се забавуваат и истовремено да научат за животните вредности како што се тимската работа и здравата исхрана. На крај, оваа работилница беше вистински „рецепт“ за создавање на убави спомени, вредности и позитивни искуства кои ќе ги носат со себе во иднината.
Маркетинг365: Како тимот на Бимилк успева да ја постигне таа магична трансформација – од бренд што произведува млечни производи до бренд што гради спомени и заедништво преку вакви настани?
Маја Велевска Литовска: Отсекогаш сме граделе бренд кој емоционално е поврзан со нашите потрошувачи. Бренд на кој луѓето му веруваат, бренд кој секојдневно ги исполнува нивните очекувања затоа што квалитетот на производите ни е на прво место, односно задоволниот потрошувач е нашиот двигател кој ни дава мотив да бидеме сé подобри и подобри.
Нашиот тим е составен од четири неверојатни жени, би рекла со супер моќи, кои ја препознаваат важноста на градење заеднички спомени со потрошувачите и локалната заедница. Тоа е она што нѐ издвојува од другите. Традиционално организираме различни настани по повод Светскиот ден на семејството, Светскиот ден на млекото, Светскиот ден на детето, како и активности по повод стартот на учебната година. Исто така, редовно реализираме донации на социјално загрозени семејства и народни кујни. Важен аспект на овие настани е што не се вклучени само нашите потрошувачи, туку и нашите вработени и локалната заедница. Овие активности имаат огромно значење за нас, а оваа година беше препознаен и нашиот придонес од страна на AmCham, која ни додели CSR признание за општествено одговорна пракса за 2024 година по повод настанот организиран за Светскиот ден на семејството – NTC семинарот ,,Воспоставување на баланс во семејството” со д-р Ранко Рајовиќ.
Како што велат, „човек може да заборави што си кажал или што си направил, но никогаш нема да заборави какви чувства си поттикнал кај него“. Овој принцип ме води во сите наши активности и верувам дека крајниот потрошувач го препознава тоа. Нашиот фокус на градење позитивни емоции и спомени во секој чекор што го правиме, ја прави нашата врска со потрошувачите длабока и искрена. Тоа е препознаено на пазарот и да, нашите брендови веќе неколку години се едни од најомилените во млечната индустрија, што е потврда за нашата посветеност на овие вредности.
Маркетинг365: Како бренд менаџер, како го пронаоѓате балансот меѓу креативноста и стратегијата? Дали некогаш дозволувате креативноста да ве „однесе“ предалеку?
Маја Велевска Литовска: Како бренд менаџер, мојата задача е да постигнам баланс помеѓу креативноста и стратегијата, што често може да биде предизвик. Иако креативноста е од суштинско значење за иновацијата и привлекување внимание, важно е да се осигураме дека секоја креативна идеја е во согласност со нашите долгорочни цели и стратегија. Понекогаш, креативните идеи можат да нѐ одведат во непланирани правци, но се обидуваме да ги задржиме фокусот и интегритетот на стратегијата преку постојано преиспитување на нашите активности.
Нашето златно правило е секогаш да се запрашаме: „Зошто го правиме тоа?“ и „Кој е крајниот резултат што сакаме да го постигнеме?“ Ова ни помага да ја задржиме јасноста и да ја насочиме креативноста таму каде што навистина е потребна.
Се разбира, верувам дека креативноста е основен двигател на успехот на секој бренд, но само ако е правилно интегрирана и во служба на стратешките цели. Затоа, важно е редовно да ги проверуваме нашите активности и да ја осигураме флексибилноста во адаптирањето на стратегијата, додека продолжуваме да иновираме. На тој начин, постигнуваме не само креативни резултати, туку и одржлив успех.
Маркетинг365: Што би рекле дека е најголемиот предизвик во маркетингот на еден традиционален бренд како Бимилк – како бренд од таков “ков” да го направите свеж, а притоа да остане верен на својата историја и вредности?
Маја Велевска Литовска: Најголемиот предизвик во маркетингот на традиционален бренд како Бимилк е да се најде начин да се комбинира богатото наследство и вредности на брендот со потребата за иновација и освежување на неговиот имиџ, особено во време кога трендовите за комуникација и исхрана брзо се менуваат. Секогаш кога работиме на кампањи или нови производи, се трудиме да го задржиме духот на Бимилк – квалитет, традиција и доверба – но истовремено да внесеме модерни елементи кои ќе го направат брендот привлечен и релевантен за новите генерации потрошувачи.
Следејќи ги трендовите за комуникација со новите генерации и новите трендови во исхраната, ние редовно ги адаптираме нашите маркетинг стратегии и канали за комуникација. На пример, кампањата „Секој ден нов рецепт“ за Битолска павлака ги комбинира традицијата и врвниот квалитет со современите потреби на потрошувачите, понудувајќи практични и креативни рецепти кои може да се применуваат во секојдневниот живот. Ова ја осовременува Битолска павлака, но ја задржува нејзината автентичност и вредности.
Истовремено, продолжуваме да ги следиме новите трендови и во производите, така што лансираме нови категории, како што е Имлек Оаза – напитоци од бадем и овес, кои ги задоволуваат потребите на потрошувачите за здрави и функционални производи. За да бидеме во чекор со времето, воведуваме нови канали за комуникација, организираме различни настани и акции кои ја збогатуваат нашата интеракција со потрошувачите. Овие активности ни овозможуваат да го одржиме брендот свеж и динамичен, прилагоден на новите трендови, додека истовремено остануваме верни на нашата традиција и врвен квалитет.
Маркетинг365: Кои се клучните принципи што ги следите при креирање на маркетинг стратегии за еден толку широк спектар на производи како млечните?
Маја Велевска Литовска: При креирањето маркетинг стратегии за млечни производи, се водиме од прилагодливост, релевантност и доследност. Прилагодливоста ја применуваме преку интегрирање на нови технологии, како што се алатките базирани на вештачка интелигенција (AI), кои ни помагаат во анализата на трендовите, креирањето нови стилови на комуникација и персонализирани кампањи. Овие алатки не само што ги следат промените во навиките на потрошувачите, туку и ни овозможуваат да бидеме креативни и да ги поедноставиме процесите. Релевантноста значи постојано усогласување со потребите на потрошувачите и трендовите во исхраната, воведувајќи иновативни производи и креативни начини на комуникација. Доследноста гарантира дека сето тоа е спроведено во рамки на нашите основни вредности, одржувајќи ја довербата и лојалноста на потрошувачите. Така, успешно ги спојуваме традицијата и иновацијата во сите наши активности.
Маркетинг365: Што научивте од процесот на креирање и реализација на оваа кампања? Како тоа ќе влијае врз развојот на идните маркетинг стратегии?
Маја Велевска Литовска: Процесот на креирање и реализација на кампањата „Секој ден, нов рецепт со Битолска павлака“ пред сé ни потврди дека сме поставиле правилна цел во развојот на категоријата павлака – креирање нови можности за нејзино користење. Потрошувачите не само што ја прегрнаа идејата за различни начини на употреба, туку покажаа голема заинтересираност за новите кулинарски предлози, што доведе до вистинска win-win ситуација. Тие добија идеи кои можат да ги прилагодат во зависност од времето што го имаат на располагање или од специфичните прилики за кои им е потребна павлака, додека ние како бренд ја зајакнавме нашата врска со нив.
Интеракцијата со потрошувачите ја продолживме преку креирање на Вибер заедница, која стана корисен канал за комуникација, каде што тие имаат можност да споделуваат идеи, рецепти и да добиваат нови кулинарски инспирации. Од кампањата не само што научивме нови рецепти, туку и се уверивме дека има простор за дополнителни иновации во оваа категорија. Ова ќе ни послужи како основа за идни програми кои ќе бидат насочени кон нашата кулинарска заедница.
Особено значајно беше и искуството со кулинарскиот предизвик за вработените, кој ни укажа на големиот потенцијал што го има оваа тематика за понатамошен развој и нови можности за воведување на креативни и иновативни активности. Кампањата ја потврди важноста на иновацијата како и современата комуникација затоа во иднина ќе продолжиме да ја надградуваме оваа иницијатива.
