Пред една година, нашата денешна гостинка Мартина Неданоска ја замени сигурноста на корпоративната кариера со несигурноста на сопствениот бизнис. Резултатот е Кидо Медо – платформа која за кратко време стана препознатлива адреса за родителите во потрага по настани, услуги, производи и едукативни содржини за нивните деца.
Денес, Кидо Медо веќе брои партнерства со дел од најпрепознатливите бизниси наменети за најмладите – од CoolBottles и Scoot&Ride до Фитнес Фабрика Јуниор и Ритам +.
Поводот за ова интервју е токму таа прва годишнина – момент во кој Мартина застанува, гледа назад и ни раскажува како од идеја на хартија, Кидо Медо прерасна во заедница на семејства и бизниси.
1. Кидо Медо неодамна наполни една година. Кога ќе се свртиш назад кон првиот ден, што прво ти доаѓа на ум – и на што си најмногу горда од оваа прва година?
Прво ми доаѓа на ум колку многу работа до доцни часови, истражување, пребарување и промени стојат зад оваа прва година. Од една идеја која произлезе од лична потреба, Кидо Медо денес е платформа која навистина се користи и од родители и од бизниси.
Најмногу сум горда што успеав да создадам нешто што има реална вредност за двете страни. На родителите им овозможуваме полесно да пронајдат места, активности, услуги и производи за своите деца, а на малите бизниси им даваме простор и видливост до публика која навистина им е релевантна.
Особено ми значи што преку Кидо Медо веќе сме помогнале во конкретни продажби, резервации, уписи, работилници, па дури и во отворање можности за вработување кај наши соработници.
За мене, тоа е најголемиот доказ дека идејата не останала само идеја, туку почнала да живее.
2. Каква работа работеше пред Кидо Медо и што точно те натера да ја напуштиш сигурноста на вработувањето заради сопствена идеја?
По образование сум електроинженер, но пред повеќе од 12 години професионалниот пат ме однесе во маркетингот. Работев во различни индустрии, меѓу кои ИТ, рударска индустрија, дизајн и брендирање, па дури бев и во продажба додека студирав. Низ годините стекнав многу различни искуства.
Кидо Медо всушност е спој на сите тие нешта. Аналитичкиот пристап од инженерството, креативноста од маркетингот и моето лично искуство како мајка.
Идејата започна од една многу едноставна потреба. Постојано барав каде да ги однесам децата, што да посетиме, каде да организираме роденден, која активност е добра за нив. Информациите беа расфрлани на десетици места, а многу често повторно прашував други мајки за препораки.
Тогаш си помислив дека ако јас го имам овој проблем, сигурно го имаат и многу други родители.
Одлуката да ја напуштам сигурноста на вработувањето не беше импулсивна. Беше храбар, но пресметан ризик. Како мајка на две деца, најголемата вредност што ја добив со претприемништвото е слободата подобро да го организирам своето време и да бидам поприсутна во нивниот живот. Сакав да престанат ситуациите кога децата ќе бараат внимание после градинка, а јас морам да ги игнорирам заради работен состанок.
3. Кој беше најголемиот предизвик во првите месеци, и имаше ли момент кога помисли дека нема да успее?
Најголемиот предизвик беше да убедам луѓе дека ова не е само уште една веб-страница, туку платформа која може реално да им помогне и на родителите и на бизнисите.
Особено предизвикувачки беше да се изгради довербата кај малите бизниси. Многу од нив се одлични во тоа што го работат, но немаат искуство со маркетинг, промоција, дизајн или дигитално присуство. Затоа Кидо Медо за нив не е само дополнителен канал за реклама, туку начин да добијат професионално онлајн присуство без самите да мораат да имаат цел тим зад себе.
Имало моменти на сомнеж, секако. Претприемништвото носи многу неизвесност и имав денови кога се прашував дали сум на вистинскиот пат. Но секогаш кога ќе видев конкретен резултат кај некој наш соработник или позитивна реакција од родител, повторно добивав потврда дека идејата има смисла.
4. Кидо Медо ги покрива настаните, услугите, производите, едукацијата, здравјето, спортот, уметноста и литературата за деца. Како ја одбираш и валидираш секоја компанија пред да се приклучи на платформата?
Многу внимавам кого претставувам на Кидо Медо. Целта е родителите да имаат доверба во информациите што ги наоѓаат тука, па затоа не е важно само колку еден бизнис е популарен, туку и каква услуга или производ нуди, како работи и дали е релевантен за нашата публика.
Остварувам директен контакт со соработниците и правам селекција според квалитетот и вредноста која можат да ја понудат на родителите. Многу е важна и самата комуникација со соработникот, дали го разбира концептот, проактивноста во споделување содржина и информации, колку се отворени за сугестии.
Од друга страна, многу е важно да им помогнеме и на помалите домашни бизниси кои можеби немаат голем маркетинг буџет или искуство со дигитална промоција.
Преку Кидо Медо тие добиваат мини веб-страница, профил на платформа која е насочена директно кон родители, дополнителна промоција преку нашите канали и можност да бидат дел од заеднички активности, работилници и кампањи.
Денес платформата има публика со над 400.000 прегледи месечно на веб страницата и социјалните мрежи, што за еден мал бизнис може да биде значајна дополнителна видливост.
5. Кој е типичниот родител кој ја користи Кидо Медо, и која функционалност на платформата ти донесе најмногу позитивни реакции?
Типичен корисник на Кидо Медо е родител кој бара информативна содржина, услуга или пак сака да го организира времето на своето дете квалитетно, но нема време да пребарува низ десетици профили, веб-страници и групи за да најде што му треба.
Токму затоа идејата за Кидо Медо е да биде едно место каде што родителот може да пронајде различни категории од родендени, спорт и едукација, до креативни активности, производи и настани. Особено голема видливост има содржината во Кидо магазинот каде што се споделуваат инсипративни приказни од соработниците, како и совети од нивниот домен на работа.
Од аспект на функционалности, особено позитивни реакции добивам кога родителите преку платформата можат директно да стигнат до некоја услуга или да направат резервација.
Делот за резервации веќе е автоматизиран и активно го користат неколку бизниси. Сепак, тука сè уште има еден предизвик, а тоа е довербата кај дел од публиката во целосно дигитализираниот процес, но и кај самите бизниси. Таа сè уште не е доволно развиена.
Тоа е процес и сметам дека постепено ќе се промени, особено затоа што дигитализацијата на резервациите значително го олеснува работењето и за бизнисите и за родителите.
6. Кои се плановите за Кидо Медо во втората година – нови категории, проширување надвор од Скопје или надвор од Македонија?
Во втората година веќе започна со освежување на веб страницата но фокусот ќе остане во насока на подобрување на самата платформа и автоматизирање на процесите кои ќе го олеснат користењето и за родителите и за бизнисите.
Секако, да се прошири мрежата на квалитетни партнери и надвор од Скопје, а веќе има активни клиенти од Куманово. Кидо Медо има потенцијал да биде платформа која ги поврзува родителите и бизнисите од цела Македонија, а подоцна и од регионот.
Но, не би сакала растот да биде само бројка. Најважно е да се изгради квалитетна и доверлива база на содржини и услуги.
7. Што би им порачала на другите родители кои размислуваат да го направат истиот чекор, да напуштат „сигурна“ работа заради сопствена идеја?
Мојата порака би била да веруваат во својата идеја и интуиција и да бидат решителни.
Идејата често доаѓа од некој проблем кој самите сме го искусиле. Токму тие секојдневни предизвици можат да бидат одличен извор за бизнис идеја.
Но, пред да се направи големиот чекор, важно е добро да се анализира пазарот, да се провери дали постои реална потреба, да се направи финансиска пресметка и да се има јасна стратегија.
Јас не верувам дека мораме да бираме помеѓу семејството и кариерата. Верувам дека можеме да создадеме нешто свое кое ќе ни овозможи и професионално исполнување и поголема слобода.
Не е лесно. Има многу работа, неизвесност и моменти на сомнеж. Но кога работиш на нешто во кое веруваш и гледаш дека тоа носи некаква вредност кај други корисници, чувството е навистина непроценливо.
