Агенцијата за аудио и аудиовизуелни медиумски услуги ја објави својата најнова анализа која се осврнува на родовите прашања и начинот на прикажување на мажите и жените во рекламите на националните телевизиски сервиси.
Анализирани се вкупно 33 реклами пораки и тоа: Калгон, Силан, Кока-кола (Сподели бакнеж), Ленор, Дискрет влошки, Неотел, Трансмет, Фери (Семејството Петрови), Лептен, Нести, Телеком, Кока-кола (раѓање), Крали Марко пиво, Уан (Миле), Стопанска банка, Швепс, Скопско, Циф, Цевитана, ВИП, Идеал Шипка, Монтенегро, Фијат, Газоза, Македонија осигурување, Дав, Златен даб, Олимпеја, Роса, Савекс, Тео, Шварцкоф и Д-р. Шол.
Добиените резултати од анализата укажуваат на тоа дека жените почесто се јавуваат како главни ликови и носителки на содржините на рекламните спотови, не само кога производот и/или услугата е наменет/а исклучиво за жените како потрошувачки, туку и кога е наменет/а за различни категории потрошувачи.
Претставувањето на жените како главни субјекти во рекламните спотови, намерно или случајно им наметнува традиционални улоги и вредности, и во рамки на современото општествено живеење; така што жените вообичаено се сместени во домот, претставени се како домаќинки, мајки и сопруги во или надвор од домот и/или како жени кои внимаваат и се посветени на својот физички изглед.
Мажите најчесто се претставени во деловна и канцелариска атмосфера, или пак забавувајќи се, без жените.
Најголем број жени и мажи заедно, се јавуваат во рекламите на големите компании како: Кока Кола, Скопска пивара, Стопанска банка, Македонија осигурување и Телеком.
Вкрстувањето на податоците за полот и возраста на претставените субјекти покажа дека во светот на рекламите за најубедлива се смета групата жени на возраст од 18 до 30 години (65 жени). Следна најзастапена група се мажите од истата возрасна категорија (39 мажи), потоа жените на возраст од 31-45 години (27), па мажите од таа категорија (24). Во рекламите, приближно исто се присутни жените и
мажите кои беа сместени во методолошката категорија над 46 години, а најретко се среќаваат личностите од обата пола на тинејџерска возраст
Врз основа на ова може да се констатира дека продолжува трендот според кој – за жените е општествено попрепорачливо да бидат/изгледаат помладо, но дека митот за младоста и убавината се проширува и на мажите.
Нарација
При анализирањето на вербалното изразување во рекламите – освен гласот на субјектите (искуството) за многу важен се смета и податокот за гласот на нараторот бидејќи тој се смета за глас на авторитетот, на оној кој убедува или кој го препорачува производот/услугата.
“Од овој аспект, во примерокот анализиран годинава речиси и да не постои разлика – спикерскиот глас е присутен во 27 реклами при што има 13 нараторки и 14 наратори. Занимливо е дека нараторките се јавуваат почесто во рекламите за светскиот пазар (осум жени наспроти четири мажи), а кај рекламите за домашниот и регионалниот пазар ситуацијата е обратна (десет мажи и пет жени).“, велат од АААВМУ.
Во рекламите чија целна публика се жените, женските гласови почесто се јавуваат во нараторска улога, односно наратори има во три од дванаесетте спотови наменети за жени. Нараторките се јавуваат во реклами кои се наменети за домаќинството, односно реклами за средства за перење, потоа за нега на тело и лице и реклами наменети за семејството каде што гласот на нараторките е нежен, пријатен и одговара на визуелната содржина на рекламата.
Мажите како наратори се јавуваат во реклами кои се наменети само за мажи, како на пример рекламите за пиво и за автомобил, но и во голем број реклами наменети за сите категории потрошувачи. Забележително е дека гласовите на нараторите се посмели, полни со самодоверба и убедителен тон.
