Како дел од кампањата „Where There’s a Ball, There’s a Way“ („Каде има топка, има начин“), брендот за безалкохолни пијалаци Pepsi и европската фудбалска асоцијација УЕФА објавија нов рекламен спот во пресрет на финалето на Лигата на шампионите.
Во двеминутниот спот се појавуваат повеќе популарни фудбалски имиња како Џек Грилиш, Винисиус Џуниор, Сон Хеунг-мин и Леја Вилијамсон, кои предизвикуваат група на локалци во игра на „не дозволувајте топката да ја допре земјата“. Договорот е: кој ќе ја испушти топката, им купува Pepsi на другите.
Групата драматично жонглира со топката додека случајните минувачи се собираат за да ги бодрат, додека пак во позадина се гледа стадионот Вембли каде што на 1 јуни треба да се игра овогодинешното финале во Лигата на шампионите.
И како што се чини дека Винисиус Џуниор ќе го добие натпреварот за својот тим, влетува легендарниот британски фудбалер, актер и водител Вини Џонс, кој ја упатува топката кон небото и истакнува: „Ој, има само еден Вини Џеј“. Винисиус губи, се смее и согласно договорот – ја чести публиката со ладни лименки Pepsi.
Кампањата е создадена во партнерство со Copa90, медиска компанија со седиште во Лондон и со фокус на фудбалот.
