Pew Research Center направи интересно истражување кое покажува како се однесуваме кон дигиталните асистенти. Откриле дека 54 проценти од корисниците на дигиталните асистенти во САД кога издаваат команди барем понекогаш велат „те молам“, додека само 19 проценти го кажуваат тоа редовно. Интересно е што жените се многу пољубезни од мажите кога зборуваат со дигиталните асистенти – кај нив тој процент е 62%, наспроти 45% кај мажите.
Една од можните причини за ваквото однесување е тоа што мажите генерално се позиционираат како доминантни во однос на жените, а бидејќи повеќето дигитални асистенти имаат женски глас, таквото однесување се пренесува и кон нив. Друго објаснување е дека мажите и жените различно ја третираат технологијата. Мажите сметаат дека технологијата е практична, нешто што им помага полесно да завршат работа, додека жените ја гледаат „похумано“.
За жал, истражувањето не се осврна на прашањето зошто корисниците немаат потреба да бидат учтиви кон дигиталните асистенти, така што можеме да го претпоставиме само вистинскиот одговор на тоа прашање.
Се разбира, многумина не гледаат потреба да се заблагодаруваат или да ги замолат „паметни звучници“, бидејќи тие се само машини. На крајот на краиштата, никогаш не сте замолиле тостер да направи тост или шпорет да го зготви ручекот. Но, од друга страна, со тостер или шпорет никогаш не ни разговарате. Тука повеќе станува збор за добри навики, затоа што родителите може да бидат загрижени доколку децата не се љубезни спрема дигиталните асистенти, бидејќи можат да го пренесат таквото однесување и на комуникација со други деца. Поради ова, некои компании сфатиле дека би можеле да создадат систем на наградување за деца кога тие се учтиви кон дигиталните асистенти.
Прашањето е, како нељубезните луѓе би се однесувале спрема човечките роботи? Во тој случај, дали би го смениле своето однесување во однос на задавањето команди спрема паметните звучници? За жал, сè уште не е можно да се даде прецизен одговор на ова прашање, бидејќи нема голема застапеност на ваквите роботи.
Во секој случај, бидејќи во иднина ќе имаме сè повеќе интеракции со машините, има смисла да започнеме да ги менуваме нашите стандарди за комуникација со тоа што би ги замолиме да направат нешто наместо да им наредиме, како што би можеле и да им се заблагодариме за извршената задача.
