“Next Web е дефинитивно една од најважните конференции во Европа која се занимава со маркетинг, технологија и иновации. Оваа година се одржа на четиринаесетти пат во Амстердам, а јас имав среќа по втор пат да го посетам овај фестивал и во текот на 21 предавање кои што ги слушнав во два дена, бев сведок на најновите трендови и предвидувања кога станува збор за нашата индустрија. Во продолжение, се обидов да ви ги пренесам шесте најважни трендови од оваа конференција”, вели Љубица Вукчевиќ, Insight Manager DIRECT MEDIA United Solutions.
M-Commerce е иднината на малопродажбата
Денес, две третини од сите купувања преку интернет се прават преку мобилен телефон. Кон овој тренд значително придонесуваат социјалните мрежи, кои освен што ја зголемуваат желбата за поседување артикли со тоа што им ги прикажуваат на нивните купувачи, сега нудат и можност за купување веднаш. Она што дополнително ќе го промени купувањето преку мобилните телефони е се` полесниот и побрз checkout заснован на поедноставен процес на плаќање, ни порача Харли Финкелштејн, главен оперативен директор на Shopify. Тој нагласи дека голема промена во светот на онлајн купувањата е излегувањето на многу брендови од големите портали за купување (на пр. од Амазон) заради потребата од поблизок контакт со своите купувачи.
Станува збор за пристап на кој Shopify го изградил целиот бизнис модел. Финкелштејн, исто така, истакна дека невиртуелните продавниците ќе мораат да им понудат на купувачите многу повисока вредност при самото купување, бидејќи повеќето од нив не ќе бидат во можност да се натпреваруваат со цените на онлајн продавниците. Во разговор на тема m-commerce, дознав едно интересно сознание од развиените пазари, според кое растот на купувањето на храна влијае на растот на онлајн купувањето на останатите видови на артикли, бидејќи купувачите градат навика на зачестено купување.
Вештачката интелигенција е само алатка
Осврнувајќи се на скептицизотм и стравот на јавноста поради брзиот развој на вештачката интелигенција, Кејси Козирков, Chief Decision Scientist Google, укажува на фактот дека идејата за автоматизација е стара колку и човечкиот род, затоа што човекот секогаш има потреба за вршење на работите на полесен начин, како и тоа што алатките имаат цел само доколку се поуспешни од човекот во извршувањето на одредени задачи. Таа, секако, нагласи дека етичките прашања во врска со употребата на вештачката интелигенција ќе бидат една од клучните теми во блиска иднина, а со тоа се согласи и Жилад Лотан, Vice President/Head of Data Science Buzzfeed, кој ни објасни како BuzzFeed го користи машинското учење за забрзување на процесите (категоризација на содржина, оптимизација на самиот сајт, предвидување виралност …) што им овозможува поголем и побрз раст.
Маркетинг кон машините
Врз основа на растот на подкастите – она што на TNW 2019 ни зборуваше Александер Клопинг, Founder & CEO Blendle – и зголемената присутност и употребата на куќните и други гласовни асистенти – на кои во своето предавање се осврна Пол Робсон, President EMEA Adobe, кој на TNW 2019 претстави гласовни команди за работа во Adobe програми – во блиска иднина очекуваме значаен развој во областа на аудио сферата која во последната деценија заостана зад видеото. За нас, како професионалци за огласување и комуникација, ќе биде особено интересен новиот вид на маркетинг, кој ќе се развива од овој тренд – маркетинг кон машини.
Станува збор за области чиј развој го навестуваат истражувачките инсајти кои покажуваат дека најголемиот број на луѓе кои задаваат команди на гласовните асистенти изговараат генерички називи: на пример, “Нарачај пиво”, наместо “Нарачај лименка Јелен пиво”, па всушност алгоритмот на гласовниот асистент одлучува кој бренд ќе биде нарачан. Нашата главна задача ќе биде со комуницирање на гласовниот асистент, нивните алгоритми да ги насочиме на избор на брендовите на нашите клиенти.
Каде е генерацијата Z?
И покрај тоа што е веќе врежано мислењето дека целната група од 13-17, која важи за една од групите до кои е најтешко да се допре, од Фејсбук побегна на Инстаграм, Симон Кемп, главен извршен директор во Kepios, автор на извештајот “We Are Social’s Global Digital“,преку податоци ни покажа дека Инстаграм загуби само 4% од оваа целна група во последниот квартал од 2018 година. По овој мит, Кемп, исто така, ги разобличи и оние кои тврдат дека оваа целна група отишла на Tiktok. Имено, додека Tiktok, доби речиси 200 милиони корисници во првите три месеци од 2019 година, неговиот пад веќе започна, особено кај помладите целни групи. Она што Кемп го претстави како клучен факт за оваа целна група е дека тие во голем број од социјални медиуми се селат на social community платформите. Ова претставува огромен предизвик за огласувачите, затоа што во сферата на social community нема огласувања, но до публиката може да дојде само преку внимателно избрана содржина.
Денес сите компании се технолошки компании
Мајкл Мартин, голбален раководител за дигитални производи во Најк, со илустративен пример покажа како се однесува компанија која сериозно ја разбира дигитализацијата. Објаснувајќи како искуството од офлајн светот им помогнало подобро да ги разберат луѓето, јасно ни стави до знаење дека Најк е сега “tech company“. Денес луѓето очекуваат сите искуства да бидат дигитални, па затоа и во офлајн светот тие бараат искуства кои се дигитални како оние онлајн. Затоа, минатата година Најк започна со отворање на персонализирани продавници, а оваа година работите ги издигнаа на едно ново ниво кога преку нивната апликација Nike Fit им овозможи на корисниците, скенирајќи ги своите стапала, да го утврдат точниот број на посакуваните патики со оглед на моделот на патиките, должинате, ширината и волуменот на нивните стапала и уште многу други параметри.
Како се одредува целната група во 2019 година?
Иако на сите ни е јасно дека одамна не постои нешто што може да се нарече “просечен” потрошувач, Мајкл Гастон, основач и извршен директор на Cut.com, не потсети дека повеќе не е можно да се користат дури и неколку други описи за потрошувачите, бидејќи потрошувачите не сакаат кога брендовите ги ставаат во одредени улоги, па дури често пати намерно се однесуваат спротивно од она на што брендот ги категоризирал.
Како да се размислува за целна група, зборуваше и Пурна Вирџи, Senior Manager of Global Engagement Microsoft, објаснувајќи дека пристапот воден од “просечниот потрошувач” е мртов, односно дека клучот е во инклузивниот пристап и повеќе посветено согледување на потрошувачите. Како пример за инклузивен пристап го понуди сценариото во кое специфично решение кое е смислено за само 26.000 потрошувачи без една рака е всушност, нешто што можат да го купат и 13 милиони луѓе со скршена рака, како и 8 милиони родители на мали деца кои генерално ја користат само едната рака.
