World Media Group направи истражување со клучните играчи од категориите на огласувачи, агенции, медиуми и консултантски куќи
Се чини дека експертите за маркетинг користат погрешна метрика при оценувањето на успехот на нивните контент кампањи, се вели во едно ново истражување.
Маркетинг на содржини (контент маркетинг) е високо ценет кај професионалците за маркетинг како средство за стимулирање на ангажманот на брендот, според студијата на World Media Group, но ретко се користат соодветните критериуми.
World Media Group кој е стратешки сојуз меѓу водечките светски издавачи на медиуми, вклучувајќи ги Блумберг Медиа Груп, Економист, Форбс и Вол Стрит Журнал, спроведе истражување меѓу клучните влијателни групи во категориите на огласувачи, агенции, медиуми и консултански куќи.
Истражувањето покажа дека 49% од маркетерите сметаат дека “brand engagement“, односно успехот во поттикнување на потрошувачите да поминуваат повеќе време со брендот, е главната сила на контент маркетингот. Brand engagement е значително пред “промена на перцепцијата” со 28% и “подигање на свеста” со 17%.
Сепак, постои голема веројатност дека маркетинг експертите ќе го користат мерењето на свеста и перцепцијата, а не метриката на ангажманот, како што е “времето поминато со содржината” за мерење на успешноста на кампањите.
Огромно мнозинство од маркетерите (78%) очекуваат маркетингот на содржини во следните 24 месеци ќе стане се` поважен.
“Приказната” се смета за најголема детерминанта на успехот на контент кампањата, а 71% од испитаниците веруваат во тоа. Потоа следат автентичноста (62%) и креативната имплементација (38%).
Студијата покажа дека најголем тренд во следната година ќе биде употребата на видеа со краток формат (под 60 секунди), при што 69% од испитаниците тврдат дека повеќе ќе го користат. Ова може да биде предизвик за агенциите и брендовите кои се соочуваат со задача да креираат и раскажуваат атрактивни приказни во пократки временски слотови.
Некои испитаници тврдат дека ова е погрешен пристап кон ангажирање на потрошувачите и дека содржината која е повеќе информативна и забавна е всушност подобро решение.
Останатите предвидувања на трендовите вклучуваат повеќе содржини во уреднички стил (58%), како и зголемување на бројот на објави на социјалните медиуми, како што потврдија 56% од испитаниците.
На подолг рок, виртуелната реалност и проширената реалност се највозбудливи за маркетерите, а потоа следат аудио, подкасти и гласовни содржини.
Сепак, достапноста на виртуелната реалност и поврзаните технологии, моментално е на последно место кога се во прашање факторите кои придонесуваат за избор на медиумски партнер, а само 3% од испитаниците ги наведуваат како причини. На врвот на листата, со 72%, се најде обезбедување на веродостојна уредувачка средина, проследено со квалитетот на ангажманот на публиката (65%) и профилот на публика (63%).
Извор: WARC
