Сега веќе најголемата генерација во историјата на САД, милениумците се повеќе донесуваат одлуки во име на организацијата во која работат, па маркетинг експертите треба да бидат информирани за нивните интереси, потреби и мотиви, со цел да го разберат начинот на кој одлучуваат кога се во прашање работата и купувањето.
За почеток, оние кои им се обраќаат на милениумците, би требало да отстапат од традиционалните начини на спроведување на маркетинг кампањите, како што се оние кои вклучуваат безлични телефонски разговори, бидејќи милениумците, пред се`, размислуваат за градење на односи со брендовите, што ги прави различни од претходните генерации. Ова е причината зошто лошо реагираат на споменатите телефонски повици и e-mail кампањи, чија единствена порака е “Купи сега!” Според најновите истражувања, 60% од милениумците побргу ќе се одлучат да купат нешто, доколку компанијата се фокусира на односот со клиентите, додека оние чија единствена цел е брза заработка, најверојатно, ќе ги игнорираат. Од друга страна, 34% од нив велат дека, кога станува збор за технолошка компанија, тие сакаат да имаат некое претходно искуство поврзано со производот за кој се заинтересирани.
Така, на компаниите им се препорачува во своите кампањи да додадат човечки елемент, односно моменти со кои би можеле да се идентификуваат милениумците, а кои се однесуваат на нивната работа и приватниот живот. Овие кампањи, навистина, бараат повеќе напор, бидејќи за градење односи со клиентите е потребно време, но на крајот, ќе се исплати далеку повеќе од традиционалните методи.
Друга важна работа е што милениумците полагаат повеќе значење на угледот на компанијата, отколку на традицијата, а 50% од нив сметаат дека од суштинско значење е компаниите од кои купуваат да бидат лидери на пазарот. Од друга страна, на милениумците кои купуваат технолошки производи, не им е толку важно тоа колку долго постои компанијата, а фактот дека некоја компанија работи повеќе децении нема да ги импресионира нешто посебно. Ова значи дека стартапите и младите компании имаат добри шанси да ги импресионираат кога се во прашање помладите купувачи, но само ако успеат да ги покажат придобивките од нивните производи на вистински начин. Така, компаниите на кои им недостига историја може тоа да го компензираат со добрите оценки од оние кои веќе купувале од нив, како и студиите на случаи кои зборуваат за кредибилитетот на нивните производи.
Друга важна работа е дека милениумците, за разлика од претходните генерации, ја земаат во предвид мисијата на компанијата, односно водат сметка таа да е во согласност со вредностите за кои се залагаат. И само затоа што веруваат во идеалите, милениумците полесно се одлучуваат за некоја нова услуга, доколку чувствуваат поврзаност со вредностите што ги нуди.
Бидејќи милениумците во иднина ќе имаат се` поголемо влијание врз работењето, неопходно е маркетинг експертите да обрнат повеќе внимание на нивните единствени ставови, со цел да ја добијат на тој начин нивната доверба и конечно да ги постигнат посакуваните резултати.
